Коррупцияга қарши курашиш агентлиги томонидан бюджет буюртмачилари томонидан махсус ахборот порталлари орқали амалга оширилаётган давлат харидларига оид эълонлар доимий равишда ўрганиб борилмоқда.

Аниқланишича, 2022 йилнинг октябрь ойида амалга оширилган давлат харидларидан 393,8 млрд сўмлик 55 727 та харидлар электрон дўкон, 52,3 млрд сўмлик 3 259 та харидлар электрон аукцион, 522,5 млрд сўмлик 3 697 та харидлар энг яхши таклифни танлаш, 610,5 млрд сўмлик 147 та харидлар тендер, 2 363,7 млрд сўмлик 5 484 та харидлар ягона етказиб берувчилар билан, 2 152,4 млрд сўмлик 22 895 та харидлар тўғридан-тўғри шаклда амалга оширилган.

Шу билан бирга, ўрганишларда айрим давлат бюртмачилари томонидан давлат харидларини амалга оширишда қонун бузилиш ҳолатларига йўл қўйилаётганлиги аниқланмоқда:

Жорий йилнинг октябрь ойида Агентлик томонидан буюртмачиларга аниқланган жами 15,9 млрд сўмлик қонун бузилишларни бартараф қилиш ҳамда келгусида шу каби ҳолатларига йўл қўймаслик ҳақида 12 та тақдимномалар киритилган.

Шу билан бирга, мониторинг ва ўрганишларда давлат буюртмачилари томонидан давлат харидларини амалга оширишда 14 та ҳолатда 214,8 млрд сўмлик қонунбузилиш ҳолатларига йўл қўйилганлиги аниқланиб, тўпланган ҳужжатлар ҳуқуқни муҳофаза қилувчи органларга юборилган.

Ҳозирда жами киритилган 12 та тақдимномалардан 8 таси бўйича харид натижалари бекор қилиниб, тегишли чора-тадбирлар белгилаб олинган.

Жумладан, Каттақўрғон йўл қуриш-таъмирлаш МЧЖ буюртмачилигида махсус ахборот порталига жойлаштирилган 1,0 млрд сўмлик “Юк ташиш хизмати кўрсатиш” юзасидан эълон бўйича давлат харидига оид ҳужжат ва маълумотлар ўрганилганида мазкур давлат харидида ўзаро аффилланган шахсларга тегишли тадбиркорлик субъектлари иштирок этиб, ғолибликни қўлга киритганлиги аниқланди.

Шу каби Янгийўл шаҳар ободонлаштириш бошқармаси буюртмачилигида махсус ахборот порталига жойлаштирилган 551,0 млн сўмлик “Тошкент-Самарқанд темир-йўлининг Янгийўл шаҳри ҳудудидан ўтган қисмини ободонлаштириш” юзасидан эълон бўйича давлат харидида ҳам ўзаро аффилланган шахсларга тегишли тадбиркорлик субъектлари иштирок этиб, ғолибликни қўлга киритганлиги аниқланди.

Бироқ, ҳар икки ҳолатда ҳам харид комиссияси томонидан ўзаро аффилланган шахслар харид қилиш тартиб-таомилларида иштирок этишдан четлатилмасдан Ўзбекистон Республикаси “Давлат харидлари тўғрисида”ги Қонуннинг 42-моддаси ва “Рақобат тўғрисида”ги Қонунининг 14-моддаси талаблари бузилганлиги аниқланиб, буюртмачи ва юқори ташкилотга харид натижасини бекор қилиш ва келгусида шу каби қонунбузилиш ҳолатларига йўл қўймаслик юзасидан тегишли чора-тадбирларни белгилаш ҳақида тақдимномалар киритилди.

Шунингдек, ушбу ҳолатлар юзасидан тўпланган ҳужжатлар ҳуқуқий баҳо беришлик учун Бош прокуратурага юборилди.

Коррупцияга қарши курашиш агентлиги

 Ахборот хизмати