Korrupsiyaga qarshi kurashish agentligi tomonidan byudjet buyurtmachilari tomonidan maxsus axborot portallari orqali amalga oshirilayotgan davlat xaridlariga oid eʼlonlar doimiy ravishda o‘rganib borilmoqda.

Aniqlanishicha, 2022-yilning oktyabr oyida amalga oshirilgan davlat xaridlaridan 393,8 mlrd so‘mlik 55 727 ta xaridlar elektron do‘kon, 52,3 mlrd so‘mlik 3 259 ta xaridlar elektron auksion, 522,5 mlrd so‘mlik 3 697 ta xaridlar eng yaxshi taklifni tanlash, 610,5 mlrd so‘mlik 147 ta xaridlar tender, 2 363,7 mlrd so‘mlik 5 484 ta xaridlar yagona yetkazib beruvchilar bilan, 2 152,4 mlrd so‘mlik 22 895 ta xaridlar to‘g‘ridan-to‘g‘ri shaklda amalga oshirilgan.

Shu bilan birga, o‘rganishlarda ayrim davlat byurtmachilari tomonidan davlat xaridlarini amalga oshirishda qonun buzilish holatlariga yo‘l qo‘yilayotganligi aniqlanmoqda:

Joriy yilning oktyabr oyida Agentlik tomonidan buyurtmachilarga aniqlangan jami 15,9 mlrd so‘mlik qonun buzilishlarni bartaraf qilish hamda kelgusida shu kabi holatlariga yo‘l qo‘ymaslik haqida 12 ta taqdimnomalar kiritilgan.

Shu bilan birga, monitoring va o‘rganishlarda davlat buyurtmachilari tomonidan davlat xaridlarini amalga oshirishda 14 ta holatda 214,8 mlrd so‘mlik qonunbuzilish holatlariga yo‘l qo‘yilganligi aniqlanib, to‘plangan hujjatlar huquqni muhofaza qiluvchi organlarga yuborilgan.

Hozirda jami kiritilgan 12 ta taqdimnomalardan 8 tasi bo‘yicha xarid natijalari bekor qilinib, tegishli chora-tadbirlar belgilab olingan.

Jumladan, Kattaqo‘rg‘on yo‘l qurish-taʼmirlash MCHJ buyurtmachiligida maxsus axborot portaliga joylashtirilgan 1,0 mlrd so‘mlik “Yuk tashish xizmati ko‘rsatish” yuzasidan eʼlon bo‘yicha davlat xaridiga oid hujjat va maʼlumotlar o‘rganilganida mazkur davlat xaridida o‘zaro affillangan shaxslarga tegishli tadbirkorlik subyektlari ishtirok etib, g‘oliblikni qo‘lga kiritganligi aniqlandi.

Shu kabi Yangiyo‘l shahar obodonlashtirish boshqarmasi buyurtmachiligida maxsus axborot portaliga joylashtirilgan 551,0 mln so‘mlik “Toshkent-Samarqand temir-yo‘lining Yangiyo‘l shahri hududidan o‘tgan qismini obodonlashtirish” yuzasidan eʼlon bo‘yicha davlat xaridida ham o‘zaro affillangan shaxslarga tegishli tadbirkorlik subyektlari ishtirok etib, g‘oliblikni qo‘lga kiritganligi aniqlandi.

Biroq, har ikki holatda ham xarid komissiyasi tomonidan o‘zaro affillangan shaxslar xarid qilish tartib-taomillarida ishtirok etishdan chetlatilmasdan O‘zbekiston Respublikasi “Davlat xaridlari to‘g‘risida”gi Qonunning 42-moddasi va “Raqobat to‘g‘risida”gi Qonunining 14-moddasi talablari buzilganligi aniqlanib, buyurtmachi va yuqori tashkilotga xarid natijasini bekor qilish va kelgusida shu kabi qonunbuzilish holatlariga yo‘l qo‘ymaslik yuzasidan tegishli chora-tadbirlarni belgilash haqida taqdimnomalar kiritildi.

Shuningdek, ushbu holatlar yuzasidan to‘plangan hujjatlar huquqiy baho berishlik uchun Bosh prokuraturaga yuborildi.

Korrupsiyaga qarshi kurashish agentligi

 Axborot xizmati