Жорий йилнинг 22 ноябрь куни Коррупцияга қарши курашиш агентлиги раҳбарияти, Латвия Республикаси делегацияси, Латвия Республикасининг Тошкентдаги элчихонаси ҳамда Халқаро ҳамкорлик бўйича Германия жамияти Ваколатхонаси (GIZ) вакиллари билан учрашув ташкил этилди.

Учрашувни ташкил этишдан кўзланган асосий мақсад давлат бошқаруви тизимида маъмурий ислоҳотларни амалга ошириш ва унда аксилкоррупция механизмларини жорий этиш масалалари муҳокама қилиш бўлди.

Тадбир аввалида Агентлик томонидан Ўзбекистонда коррупцияга қарши курашиш сиёсатининг шаклланиши, соҳада қабул қилинган ва қилинаётган ҳуқуқий ҳужжатлар, амалга оширилаётган чора-тадбирлар ва сўнги ислоҳотлар, қолаверса бунда халқаро ташкилотлар ва хорижий давлатлар билан ўрнатилган алоқалар юзасидан тақдимот ўтказилди.

Ўз ўрнида, Латвия делегацияси вакиллари томонидан мамлакатимизда коррупциянинг олдини олиш ва унга қарши курашишга қаратилаётган эътибор ва бу борада қўлланилаётган чора-тадбирлар юқори баҳоланиб, мазкур ислоҳотларни қўллаб-қувватлаш ва узоқ муддатли ҳамкорлик лойиҳаларини амалга ошириш истаги билдирилди.

Шундан сўнг, Латвиянинг “очиқ ҳукумат” сиёсати, яширин иқтисодиётга қарши ислоҳотлари, коррупцияга қарши курашишга қаратилган турли йўналишдаги электрон платформаларни ишлаб чиқиш тажрибаси билан танишилди. 

 Шу билан бир қаторда, делегациянинг Ўзбекистонда давлат хизматчилари мол-мулки ва даромадларини декларация қилиш тизимининг жорий этилиши,  бугунги кунда Агентлик ва бошқа давлатлар ўртасида ўрнатилган ҳамкорлик алоқалари юзасидан саволларига жавоблар тақдим этилди.

Агентлик томонидан Ўзбекистонда самарали бошқарув йўналишида коррупцияга қарши курашиш бўйича ўқув машғулотлари, тренинг ва семинарларни ташкил этиш, маҳсус ўқув дастурларни ишлаб чиқиш ва шу ўринда Рига олий юридик мактабида стажировкаларни амалга ошириш юзасидан дастлабки таклифлар илгари сурилди.

Учрашув сўнггида Агентлик ва Латвия ваколатли идоралари ўртасидаги ҳамкорлик алоқаларини мустаҳкамлаш, соҳада биргаликда амалга ошириладиган аниқ таклифларни ишлаб чиқиш ва тақдим этиш юзасидан келишувга эришилди.

Коррупцияга қарши курашиш агентлиги

Ахборот хизмати