Joriy yilning 22-noyabr kuni Korrupsiyaga qarshi kurashish agentligi rahbariyati, Latviya Respublikasi delegatsiyasi, Latviya Respublikasining Toshkentdagi elchixonasi hamda Xalqaro hamkorlik bo‘yicha Germaniya jamiyati Vakolatxonasi (GIZ) vakillari bilan uchrashuv tashkil etildi.

Uchrashuvni tashkil etishdan ko‘zlangan asosiy maqsad davlat boshqaruvi tizimida maʼmuriy islohotlarni amalga oshirish va unda aksilkorrupsiya mexanizmlarini joriy etish masalalari muhokama qilish bo‘ldi.

Tadbir avvalida Agentlik tomonidan O‘zbekistonda korrupsiyaga qarshi kurashish siyosatining shakllanishi, sohada qabul qilingan va qilinayotgan huquqiy hujjatlar, amalga oshirilayotgan chora-tadbirlar va so‘ngi islohotlar, qolaversa bunda xalqaro tashkilotlar va xorijiy davlatlar bilan o‘rnatilgan aloqalar yuzasidan taqdimot o‘tkazildi.

O‘z o‘rnida, Latviya delegatsiyasi vakillari tomonidan mamlakatimizda korrupsiyaning oldini olish va unga qarshi kurashishga qaratilayotgan eʼtibor va bu borada qo‘llanilayotgan chora-tadbirlar yuqori baholanib, mazkur islohotlarni qo‘llab-quvvatlash va uzoq muddatli hamkorlik loyihalarini amalga oshirish istagi bildirildi.

Shundan so‘ng, Latviyaning “ochiq hukumat” siyosati, yashirin iqtisodiyotga qarshi islohotlari, korrupsiyaga qarshi kurashishga qaratilgan turli yo‘nalishdagi elektron platformalarni ishlab chiqish tajribasi bilan tanishildi. 

Shu bilan bir qatorda, delegatsiyaning O‘zbekistonda davlat xizmatchilari mol-mulki va daromadlarini deklaratsiya qilish tizimining joriy etilishi, bugungi kunda Agentlik va boshqa davlatlar o‘rtasida o‘rnatilgan hamkorlik aloqalari yuzasidan savollariga javoblar taqdim etildi.

Agentlik tomonidan O‘zbekistonda samarali boshqaruv yo‘nalishida korrupsiyaga qarshi kurashish bo‘yicha o‘quv mashg‘ulotlari, trening va seminarlarni tashkil etish, mahsus o‘quv dasturlarni ishlab chiqish va shu o‘rinda Riga oliy yuridik maktabida stajirovkalarni amalga oshirish yuzasidan dastlabki takliflar ilgari surildi.

Uchrashuv so‘nggida Agentlik va Latviya vakolatli idoralari o‘rtasidagi hamkorlik aloqalarini mustahkamlash, sohada birgalikda amalga oshiriladigan aniq takliflarni ishlab chiqish va taqdim etish yuzasidan kelishuvga erishildi.

Korrupsiyaga qarshi kurashish agentligi

Axborot xizmati