9 декабрь – Халқаро коррупцияга қарши кураш куни муносабати билан жорий йилнинг 29 ноябрь куни Коррупцияга қарши курашиш агентлиги, Бизнес-омбудсман, Савдо-саноат палатаси, шунингдек, БМТнинг Гиёҳванд моддалар ва жиноятчилик бўйича минтақавий бошқармаси, БМТ Тараққиёт Дастури, Европада хавфсизлик ва ҳамкорлик ташкилоти ҳамкорлигида “Ўзбекистон бизнес ҳамжамиятида  ҳалоллик” II бизнес-форуми ўтказилди.

 Унда турли соҳаларда фаолият кўрсатаётган тадбиркорлик субъектлари, вазирлик ва идоралар, ОАВ, жамоатчилик ва халқаро ташкилотларнинг вакиллари ҳамда хорижий экспертлар Ўзбекистонда бизнес вакиллари фаолияти учун яратилаётган имкониятлар, соҳадаги мавжуд муаммоларга оқилона ечимлар юзасидан ўзаро мулоқот қилинди.

Ўтган йилги илк Форум доирасида Агентлик, Бизнес-омбудсман ва Савдо-саноат палатаси томонидан “Ўзбекистон бизнесининг коррупцияга қарши курашиш Хартияси” қабул қилинган эди.

Мазкур ҳужжат тадбиркорлик субъектининг молиявий фаолиятини бошқариш, шартнома муносабатлари, кадрларни танлаш ва ўқитиш, ички интизом ва қонунийликни мустаҳкамлаш, давлат харидлари каби муҳим йўналишларда коррупция хавфларининг олдини олишга қаратилган комплекс чораларни қамраб олган.

Ўтган қисқа вақт давомида Хартияга 267 нафар тадбиркорлар қўшилиб, коррупциядан холи равишда бизнес юритиш вазифасини ўз зиммасига олди.

Жорий йилнинг 10 ноябрь куни Коррупцияга қарши курашиш агентлигида “Бизнес — коррупцияга қарши” мавзусида ташкил этилган яна бир мулоқотда  тадбиркорлик субъектлари ва бизнес вакиллари дуч келаётган муаммолар, жумладан, ноқонуний аралашувлар, коррупцион хавф-хатарлар юзасидан сўровнома ўтказилди.

Унда иштирок этган тадбиркорларнинг 59,4 % сўнгги бир йил давомида коррупция даражаси камайган деган фикрни билдирди. 

43,5% тадбиркорлар фаолияти давомида бундай салбий ҳолатлар умуман кузатилмаганлигини маълум қилди. 22,5% тадбиркорлик субъектлари эса коррупцион ҳолатлар билан тўқнашганини,  34% тадбиркорлар бундай муаммолар баъзан учраб туришини қайд этди.

Шу каби муҳим жиҳатларни инобатга олган ҳолда бу йилги бизнес-форум ўз ишини “Соҳанинг норматив-ҳуқуқий асосларини коррупциявий хавф-хатарлардан ҳоли тарзда тартибга солиш”, “Коррупциявий хавф-хатарларга оид баҳслардан, коррупцияга қарши курашиш соҳасидаги амалий ҳаракатлар сари” мавзулардаги иккита сессия асосида олиб борди.

Мазкур сессиялар доирасидаги мулоқотларда тадбиркорликнинг эркин ривожланиши, соҳадаги қонунчиликни такомиллаштиришда коррупциявий омилларни бартараф этиш, қонун ҳужжатларини коррупцияга қарши экспертизадан ўтказиш жараёнига бизнес ҳамжамиятининг экспертлик салоҳиятини самарали жалб қилиш имкониятлари, мамлакатнинг инвестициявий жозибадорлигини ошириш каби долзарб масалалар атрофлича муҳокама қилинди.

Шунингдек, экспертлар томонидан бизнес соҳасида ҳалоллик стандартларига амал қилиш, коррупцияга қарши муросасиз курашиш, биргаликда шаффоф Ипак йўли ташаббусини яратиш, тадбиркорлик фаолиятидаги коррупциявий хавф-хатарларнинг  қонунчиликдаги бўшлиқлар билан ўзаро боғлиқлиги,  халқаро амалиёт ва хорижий тажрибадаги ютуқларга бағишланган тақдимотлар ўтказилди.

Юқорида қайд этилган масалаларда билдирилган фикр-мулоҳазалар, тавсиялар асосида хусусий секторда коррупцияга қарши курашиш тизимини янада такомиллаштиришга доир амалий таклифлар ишлаб чиқилди.

Форум доирасида Ўзбекистон бизнесининг коррупцияга қарши курашиш Хартиясининг аъзолигига янги қабул қилинган тадбиркорлик субъектларига аъзолик сертификатларини топшириш маросими ҳам бўлиб ўтди.

Коррупцияга қарши курашиш агентлиги

 Ахборот хизмати