9-dekabr – Xalqaro korrupsiyaga qarshi kurash kuni munosabati bilan joriy yilning 29-noyabr kuni Korrupsiyaga qarshi kurashish agentligi, Biznes-ombudsman, Savdo-sanoat palatasi, shuningdek, BMTning Giyohvand moddalar va jinoyatchilik bo‘yicha mintaqaviy boshqarmasi, BMT Taraqqiyot Dasturi, Yevropada xavfsizlik va hamkorlik tashkiloti hamkorligida “O‘zbekiston biznes hamjamiyatida halollik” II biznes-forumi o‘tkazildi.

Unda turli sohalarda faoliyat ko‘rsatayotgan tadbirkorlik subyektlari, vazirlik va idoralar, OAV, jamoatchilik va xalqaro tashkilotlarning vakillari hamda xorijiy ekspertlar O‘zbekistonda biznes vakillari faoliyati uchun yaratilayotgan imkoniyatlar, sohadagi mavjud muammolarga oqilona yechimlar yuzasidan o‘zaro muloqot qilindi.

O‘tgan yilgi ilk Forum doirasida Agentlik, Biznes-ombudsman va Savdo-sanoat palatasi tomonidan “O‘zbekiston biznesining korrupsiyaga qarshi kurashish Xartiyasi” qabul qilingan edi.

Mazkur hujjat tadbirkorlik subyektining moliyaviy faoliyatini boshqarish, shartnoma munosabatlari, kadrlarni tanlash va o‘qitish, ichki intizom va qonuniylikni mustahkamlash, davlat xaridlari kabi muhim yo‘nalishlarda korrupsiya xavflarining oldini olishga qaratilgan kompleks choralarni qamrab olgan.

O‘tgan qisqa vaqt davomida Xartiyaga 267 nafar tadbirkorlar qo‘shilib, korrupsiyadan xoli ravishda biznes yuritish vazifasini o‘z zimmasiga oldi.

Joriy yilning 10-noyabr kuni Korrupsiyaga qarshi kurashish agentligida “Biznes — korrupsiyaga qarshi” mavzusida tashkil etilgan yana bir muloqotda tadbirkorlik subyektlari va biznes vakillari duch kelayotgan muammolar, jumladan, noqonuniy aralashuvlar, korrupsion xavf-xatarlar yuzasidan so‘rovnoma o‘tkazildi.

Unda ishtirok etgan tadbirkorlarning 59,4 % so‘nggi bir yil davomida korrupsiya darajasi kamaygan degan fikrni bildirdi. 

43,5% tadbirkorlar faoliyati davomida bunday salbiy holatlar umuman kuzatilmaganligini maʼlum qildi. 22,5% tadbirkorlik subyektlari esa korrupsion holatlar bilan to‘qnashganini, 34% tadbirkorlar bunday muammolar baʼzan uchrab turishini qayd etdi.

Shu kabi muhim jihatlarni inobatga olgan holda bu yilgi biznes-forum o‘z ishini “Sohaning normativ-huquqiy asoslarini korrupsiyaviy xavf-xatarlardan holi tarzda tartibga solish”, “Korrupsiyaviy xavf-xatarlarga oid bahslardan, korrupsiyaga qarshi kurashish sohasidagi amaliy harakatlar sari” mavzulardagi ikkita sessiya asosida olib bordi.

Mazkur sessiyalar doirasidagi muloqotlarda tadbirkorlikning erkin rivojlanishi, sohadagi qonunchilikni takomillashtirishda korrupsiyaviy omillarni bartaraf etish, qonun hujjatlarini korrupsiyaga qarshi ekspertizadan o‘tkazish jarayoniga biznes hamjamiyatining ekspertlik salohiyatini samarali jalb qilish imkoniyatlari, mamlakatning investitsiyaviy jozibadorligini oshirish kabi dolzarb masalalar atroflicha muhokama qilindi.

Shuningdek, ekspertlar tomonidan biznes sohasida halollik standartlariga amal qilish, korrupsiyaga qarshi murosasiz kurashish, birgalikda shaffof Ipak yo‘li tashabbusini yaratish, tadbirkorlik faoliyatidagi korrupsiyaviy xavf-xatarlarning qonunchilikdagi bo‘shliqlar bilan o‘zaro bog‘liqligi, xalqaro amaliyot va xorijiy tajribadagi yutuqlarga bag‘ishlangan taqdimotlar o‘tkazildi.

Yuqorida qayd etilgan masalalarda bildirilgan fikr-mulohazalar, tavsiyalar asosida xususiy sektorda korrupsiyaga qarshi kurashish tizimini yanada takomillashtirishga doir amaliy takliflar ishlab chiqildi.

Forum doirasida O‘zbekiston biznesining korrupsiyaga qarshi kurashish Xartiyasining aʼzoligiga yangi qabul qilingan tadbirkorlik subyektlariga aʼzolik sertifikatlarini topshirish marosimi ham bo‘lib o‘tdi.

Korrupsiyaga qarshi kurashish agentligi

 Axborot xizmati