Бугун «Давлат-хусусий шериклик асосида мактабгача таълим муассасаларини ташкил этишда ва уларнинг фаолиятида ноҳалоллик хавфи омиллари» мавзусидаги тадқиқот натижаларининг жамоатчилик муҳокамаси бўлиб ўтди.

Мазкур тадбир Коррупцияга қарши курашиш агентлиги, «Юксалиш» умуммиллий ҳаракати ва «Минтақавий мулоқот» халқаро нодавлат ташкилоти (Словения) ҳамкорлигида ташкил этилди.

Муҳокамалар аввалида Коррупцияга қарши курашиш агентлиги директори А.Бурханов мазкур тадқиқотнинг бугунги кундаги долзарб аҳамияти хусусида тўхталиб ўтди.

Таъкидланганидек, тадқиқот 2020 йилдан Коррупцияга қарши курашиш агентлиги томонидан «Юксалиш» умуммиллий ҳаракати ҳамда «Минтақавий мулоқот» халқаро нодавлат ташкилоти (Словения) ҳамкорлигида амалга ошириб келинаётган «Ўзбекистонда биринчи антикоррупция лабораторияларини яратиш» лойиҳаси доирасида ўтказилди.

Бугунга қадар тадқиқот доирасида турли гуруҳ респондентлар (413 нафар) ўртасида ижтимоий сўровлар ўтказиш ишлари якунланди.

Сўровларга республикамизнинг 7 та ҳудуди — Тошкент, Бухоро, Андижон, Самарқанд, Сурхондарё, Қашқадарё вилоятлари ва пойтахтдаги туман мактабгача таълим бўлимлари, ҳокимликлар, банклар вакиллари, давлат-хусусий шериклик асосидаги мактабгача таълим муассасалари раҳбарлари, тарбияланувчиларнинг ота-оналари жалб қилинди.

Дастлабки натижаларга кўра, мактабгача таълим муассасаларини давлат-хусусий шерикчилик асосида ташкил этиш босқичларида коррупциявий хавф-хатарлар юқори даражада сақланиб қолмоқда.

Хусусан, давлат-хусусий шериклик асосидаги мактабгача таълим муассасалари учун лойиҳа ҳужжатларини тайёрлашда тадбиркорларнинг 25 фоизи ариза бериш тартибини мураккаб, 17 фоизи шаффоф эмас, 10 фоизи ўта бюрократик деб атаган.

Тадбирда тадқиқотнинг шу каби натижаларидан келиб чиққан ҳолда экспертларнинг коррупцияга қарши курашиш стратегиялари ва коррупция хавфини баҳолаш методологияси бўйича маърузалари тингланди.

Шунингдек, амалдаги қонунчиликка коррупция хавфини камайтиришга доир ўзгартишлар киритиш бўйича фикр-мулоҳаза ва тавсиялар  билдирилди.

Муҳокама якунида тадқиқотни янада ривожлантиришда коррупция хавфининг аниқланган омилларини камайтириш ва давлат-хусусий шериклик асосидаги лойиҳалар самарадорлигини оширишда ҳамкорликдаги ҳаракатларни янада кучайтириш таклиф этилди.

Коррупцияга қарши курашиш агентлиги

Ахборот хизмати