Bugun “Davlat-xususiy sheriklik asosida maktabgacha taʼlim muassasalarini tashkil etishda va ularning faoliyatida nohalollik xavfi omillari” mavzusidagi tadqiqot natijalarining jamoatchilik muhokamasi bo‘lib o‘tdi.

Mazkur tadbir Korrupsiyaga qarshi kurashish agentligi, “Yuksalish” umummilliy harakati va “Mintaqaviy muloqot” xalqaro nodavlat tashkiloti (Sloveniya) hamkorligida tashkil etildi.

Muhokamalar avvalida Korrupsiyaga qarshi kurashish agentligi direktori A.Burxanov mazkur tadqiqotning bugungi kundagi dolzarb ahamiyati xususida to‘xtalib o‘tdi.

Taʼkidlanganidek, tadqiqot 2020-yildan Korrupsiyaga qarshi kurashish agentligi tomonidan “Yuksalish” umummilliy harakati hamda “Mintaqaviy muloqot” xalqaro nodavlat tashkiloti (Sloveniya) hamkorligida amalga oshirib kelinayotgan “O‘zbekistonda birinchi antikorrupsiya laboratoriyalarini yaratish” loyihasi doirasida o‘tkazildi.

Bugunga qadar tadqiqot doirasida turli guruh respondentlar (413 nafar) o‘rtasida ijtimoiy so‘rovlar o‘tkazish ishlari yakunlandi.

So‘rovlarga respublikamizning 7 ta hududi — Toshkent, Buxoro, Andijon, Samarqand, Surxondaryo, Qashqadaryo viloyatlari va poytaxtdagi tuman maktabgacha taʼlim bo‘limlari, hokimliklar, banklar vakillari, davlat-xususiy sheriklik asosidagi maktabgacha taʼlim muassasalari rahbarlari, tarbiyalanuvchilarning ota-onalari jalb qilindi.

Dastlabki natijalarga ko‘ra, maktabgacha taʼlim muassasalarini davlat-xususiy sherikchilik asosida tashkil etish bosqichlarida korrupsiyaviy xavf-xatarlar yuqori darajada saqlanib qolmoqda.

Xususan, davlat-xususiy sheriklik asosidagi maktabgacha taʼlim muassasalari uchun loyiha hujjatlarini tayyorlashda tadbirkorlarning 25 foizi ariza berish tartibini murakkab, 17 foizi shaffof emas, 10 foizi o‘ta byurokratik deb atagan.

Tadbirda tadqiqotning shu kabi natijalaridan kelib chiqqan holda ekspertlarning korrupsiyaga qarshi kurashish strategiyalari va korrupsiya xavfini baholash metodologiyasi bo‘yicha maʼruzalari tinglandi.

Shuningdek, amaldagi qonunchilikka korrupsiya xavfini kamaytirishga doir o‘zgartishlar kiritish bo‘yicha fikr-mulohaza va tavsiyalar  bildirildi.

Muhokama yakunida tadqiqotni yanada rivojlantirishda korrupsiya xavfining aniqlangan omillarini kamaytirish va davlat-xususiy sheriklik asosidagi loyihalar samaradorligini oshirishda hamkorlikdagi harakatlarni yanada kuchaytirish taklif etildi.

Korrupsiyaga qarshi kurashish agentligi

Axborot xizmati