“Ўзтемирйўлназорат” инспекциясида  9 декабрь – Халқаро коррупцияга қарши кураш куни муносабати билан "Аксилкоррупция ҳафталиги" доирасида  коррупцияга қарши курашишнинг долзарб аҳамиятига бағишланган тадбир ташкил этилди. 

Унда Коррупцияга қарши курашиш агентлиги масъул ходими О.Абдуғаниев Ўзбекистонда коррупцияга қарши курашиш сиёсатининг шаклланиши, соҳада қилинаётган ҳуқуқий ҳужжатлар, амалга оширилаётган чора-тадбирлар  ва уларнинг мазмун-моҳиятига бағишланган маъруза билан иштирок этди. 

Агентлик вакили ўз маърузасида, жумладан, давлат органлари ва ташкилотларида коррупцияга қарши курашиш ишларининг самарадорлигини рейтинг баҳолаш тизими, давлат органлари ва ташкилотларида очиқлик сиёсатини йўлга қўйиш бўйича амалга оширилаётган ишлар самарадорлиги, манфаатлар тўқнашувининг олдини олиш ва бартараф этишга оид ишлар ҳақида тўлиқ маълумот бериб ўтди. 

Тадбир давомида инспекциянинг“комплаенс назорат” тузилмаси фаолияти, эришилаётган натижалар ва келгусидаги мақсад-вазифалар хусусида ҳам сўз юритилди.

Таъкидландики, мазкур тузилма томонидан инспекцияда коррупцияга қарши курашиш соҳасига оид   10 дан ортиқ идоравий ҳужжатлар қабул қилинган.  Шунингдек, айни пайтда инспекция тизимида давом этаётган “Коррупцияга қарши курашиш ойлиги” доирасида Тошкент, Ғузор, Наманган шаҳарларида шохобча темир йўлига эга тадбиркорлик субъектлари билан  очиқ давра суҳбатлари ўтказилди. 

Тадбир якунида Агентлик ҳамда инспекция  ўртасида ҳамкорлик алоқаларини янада мустаҳкамлаш, биргаликдаги саъй-ҳаракатларни кучайтириш бўйича таклиф ва мулоҳазалар билдирилди.

Коррупцияга қарши курашиш агентлиги

Ахборот хизмати