“O‘ztemiryo‘lnazorat” inspeksiyasida 9 dekabr – Xalqaro korrupsiyaga qarshi kurash kuni munosabati bilan "Aksilkorrupsiya haftaligi" doirasida korrupsiyaga qarshi kurashishning dolzarb ahamiyatiga bag‘ishlangan tadbir tashkil etildi.

Unda Korrupsiyaga qarshi kurashish agentligi masʼul xodimi O.Abdug‘aniyev O‘zbekistonda korrupsiyaga qarshi kurashish siyosatining shakllanishi, sohada qilinayotgan huquqiy hujjatlar, amalga oshirilayotgan chora-tadbirlar va ularning mazmun-mohiyatiga bag‘ishlangan maʼruza bilan ishtirok etdi.

Agentlik vakili o‘z maʼruzasida, jumladan, davlat organlari va tashkilotlarida korrupsiyaga qarshi kurashish ishlarining samaradorligini reyting baholash tizimi, davlat organlari va tashkilotlarida ochiqlik siyosatini yo‘lga qo‘yish bo‘yicha amalga oshirilayotgan ishlar samaradorligi, manfaatlar to‘qnashuvining oldini olish va bartaraf etishga oid ishlar haqida to‘liq maʼlumot berib o‘tdi.

Tadbir davomida inspeksiyaning“komplayens nazorat” tuzilmasi faoliyati, erishilayotgan natijalar va kelgusidagi maqsad-vazifalar xususida ham so‘z yuritildi.

Taʼkidlandiki, mazkur tuzilma tomonidan inspeksiyada korrupsiyaga qarshi kurashish sohasiga oid 10 dan ortiq idoraviy hujjatlar qabul qilingan. Shuningdek, ayni paytda inspeksiya tizimida davom etayotgan “Korrupsiyaga qarshi kurashish oyligi” doirasida Toshkent, G‘uzor, Namangan shaharlarida shoxobcha temir yo‘liga ega tadbirkorlik subyektlari bilan ochiq davra suhbatlari o‘tkazildi.

Tadbir yakunida Agentlik hamda inspeksiya o‘rtasida hamkorlik aloqalarini yanada mustahkamlash, birgalikdagi saʼy-harakatlarni kuchaytirish bo‘yicha taklif va mulohazalar bildirildi.

Korrupsiyaga qarshi kurashish agentligi

Axborot xizmati