8 декабрь — Ўзбекистон Республикасининг Конституцияси қабул қилинган кун муносабати билан Коррупцияга қарши курашиш агентлигида  байрам тадбири ташкил этилди.   

Унда Агентлик раҳбарияти жамоани ушбу қутлуғ сана билан қутлаб, Бош Қомусимизнинг давлат ва жамият ҳаётидаги долзарб аҳамияти хусусида тўхталиб ўтди.

Таъкидланганидек, мамлакатимиз Конституцияси 30 йилдирки, адолатли ва халқпарвар давлат барпо этишга қаратилган улуғвор мақсад, улкан вазифаларни амалга оширишда мустаҳкам ҳуқуқий пойдевор бўлиб келмоқда. 

Тадбирда Бош Конституция нормаларини ҳаётга тўла татбиқ этиш, жамиятда қонун ва адолат устуворлигини таъминлаш,  коррупцияга қарши курашишга қаратилган сиёсатни изчил давом эттиришда Агентлик фаолиятини янада кучайтириш, демократик янгиланишларга фаол ҳисса қўшиш зарурати хусусида ҳам сўз юритилди. 

Айтиш жоиз,  Конституциямиз қабул қилинганлигининг бу йилги шодиёнаси Агентлик фаолиятида муҳим тарихий кун сифатида муҳрланадиган бўлди. 

Боиси  қутлуғ сана арафасида  давлатимиз раҳбари томонидан Агентликнинг 18 нафар ходими “Ўзбекистон Конституциясининг 30 йиллиги” эсдалик нишонига муносиб кўрилди. 

Байрам тадбирида ушбу нуфузли эсдалик нишонини ўз эгаларига тантанали тарзда топшириш маросими бўлиб ўтди.    

Шунингдек, меҳнат фаолияти мобайнида алоҳида фаоллик кўрсатиб, юқори самарадорлик ва натижадорликка эришиб келаётган бир гуруҳ ходимлар Агентлик раҳбарияти томонидан Фахрий ёрлиқ ва Ташаккурномалар билан тақдирланди.  

Коррупцияга қарши курашиш агентлиги 
Ахборот хизмати