8-dekabr — O‘zbekiston Respublikasining Konstitutsiyasi qabul qilingan kun munosabati bilan Korrupsiyaga qarshi kurashish agentligida bayram tadbiri tashkil etildi.  

Unda Agentlik rahbariyati jamoani ushbu qutlug‘ sana bilan qutlab, Bosh Qomusimizning davlat va jamiyat hayotidagi dolzarb ahamiyati xususida to‘xtalib o‘tdi.

Taʼkidlanganidek, mamlakatimiz Konstitutsiyasi 30 yildirki,adolatli va xalqparvar davlat barpo etishga qaratilgan ulug‘vor maqsad, ulkan vazifalarni amalga oshirishda mustahkam huquqiy poydevor bo‘lib kelmoqda. 

Tadbirda Bosh Konstitutsiya normalarini hayotga to‘la tatbiq etish, jamiyatda qonun va adolat ustuvorligini taʼminlash, korrupsiyaga qarshi kurashishga qaratilgan siyosatni izchil davom ettirishda Agentlik faoliyatini yanada kuchaytirish, demokratik yangilanishlarga faol hissa qo‘shish zarurati xususida ham so‘z yuritildi. 

Aytish joiz, Konstitutsiyamiz qabul qilinganligining bu yilgi shodiyonasi Agentlik faoliyatida muhim tarixiy kun sifatida muhrlanadigan bo‘ldi. 

Boisi qutlug‘ sana arafasida davlatimiz rahbari tomonidan Agentlikning 18 nafar xodimi “O‘zbekiston Konstitutsiyasining 30 yilligi” esdalik nishoniga munosib ko‘rildi. 

Bayram tadbirida ushbu nufuzli esdalik nishonini o‘z egalariga tantanali tarzda topshirish marosimi bo‘lib o‘tdi.   

Shuningdek, mehnat faoliyati mobaynida alohida faollik ko‘rsatib, yuqori samaradorlik va natijadorlikka erishib kelayotgan bir guruh xodimlar Agentlik rahbariyati tomonidan Faxriy yorliq va Tashakkurnomalar bilan taqdirlandi.  

Korrupsiyaga qarshi kurashish agentligi 

Axborot xizmati