9 декабрь – Халқаро коррупцияга қарши курашиш куни муносабати билан ўтказилаётган “Аксилкоррупция ҳафталиги” доирасида Коррупцияга қарши курашиш агентлиги томонидан жорий йилнинг 5 декабрь куни “Коррупцияга қарши курашишда фуқаролик жамияти институти вакилларининг иштироки: муаммо ва ечимлар” мавзусида нодавлат нотижорат ташкилотлари  (ННТлар)  вакиллари билан  мулоқот бўлиб ўтди.

Адлия вазирлиги, Бош прокуратура, БМТ Тараққиёт Дастури (БМТ ТД), БМТнинг Гиёҳванд моддалар ва жиноятчилик бошқармаси (БМТ ГЖБ), “Минтақавий мулоқот” халқаро нодавлат ташкилоти (Словения) ҳамкорлигида ташкил этилган мазкур тадбирда турли соҳаларда фаолият юритаётган 40 дан зиёд ННТ вакиллари  иштирок этди.

Мазкур мулоқот орқали коррупцияга қарши курашиш жараёнларига фуқаролик жамияти институтлари, хусусан, ННТ вакилларини кенг жалб қилиш, соҳадаги ислоҳотлар ижросини таъминлашда уларнинг иштирокини кучайтириш ва фаоллигини ошириш, шунингдек, бу йўналишда ўзаро ҳамкорлик алоқаларини янада мустаҳкамлаш масалаларини муҳокама қилиш мақсад қилинган.  

Шу мақсадда фаол мулоқотлар мобайнида коррупцияга қарши курашиш соҳасида ННТларнинг имкониятларидан тўлиқ фойдаланишга тўсиқ бўлаётган муаммолар ҳамда уларни бартараф этишнинг аниқ ва амалий ечимлари хусусида ўзаро фикр алмашилди.

ННТ учун коррупцияга қарши курашишда янги усул ва воситалар, ушбу жараёнларда хорижий давлатлар илғор тажрибасини ўрганиш, ОАВ орқали коррупциянинг олдини олиш ва ҳалолликни шакллантириш механизмлари каби масалалар атрофлича муҳокама қилинди.

Тадбирда  БМТ ТД, “Минтақавий мулоқот” халқаро нодавлат ташкилоти халқаро экспертларининг фуқаролик жамиятида коррупцияни минималлаштиришга қаратилган асосий чора-тадбирлар, коррупцияга қарши курашишда ННТлар иштирокининг муҳим жиҳатлари, бу борада илғор хорижий тажрибаларга эътибор қаратилди. 

Шунингдек, ННТлар билан биргаликда ижтимоий шериклик ва жамоатчилик назоратини амалга ошириш асосида коррупциянинг олдини олиш ва унга қарши курашишга оид ижтимоий лойиҳаларни ҳаётга татбиқ этиш масалалари кўриб чиқилди.

Мулоқот доирасида “Фуқаролик жамияти институтларини коррупцияга қарши курашиш ва олдини олишда инновацияларни ишлаб чиқиш ва жорий этиш жараёнига жалб қилиш” қўшма танлови ғолибларининг тақдимоти ҳам бўлиб ўтди.

Маълумот ўрнида: Мазкур қўшма танлов жорий йил (17 июнь-10 июль кунлари давомида) Коррупцияга қарши курашиш агентлиги, Адлия вазирлиги, Бош прокуратура ва БМТ ТД томонидан “Ўзбекистонда самарали, ҳисоб берувчи ва шаффоф бошқарув институтлари орқали коррупцияга қарши курашиш” ва “Ўзбекистонда коррупцияга қарши курашиш агентлиги ролини ошириш учун фуқаролик маконини, аёллар ва ёшлар овозини мустаҳкамлаш” лойиҳалари доирасида ташкил этилди. Унда 9 та ННТ ғолиб деб топилди ва коррупцияга оид лойиҳаларини ҳаётга татбиқ этишди.

Тақдимотларда, лойиҳалар доирасида журналистлар малакаси оширилди, аёлларнинг фаоллигини оширишга оид тренинглар бўлиб ўтди, талаба ёшлар учун коворкинг маркази ташкил этилди, ҳудудлардаги мактаб ўқувчилари учун ҳалоллик дарслари ўтказилди, мактаб ва мактабгача таълим муассасалари учун коррупцияга оид билимларни ўзида акс эттирган қўлланмалар тайёрлангани қайд этилди.

Тадбир якунида ҳудудлар ва соҳалар кесимида коррупцион хавф-хатарларни аниқлаш ва уларнинг сабабларини ўрганишга оид социологик тадқиқотлар ташкил этишда ҳам ННТларни жалб этиш орқали уларнинг давлат ва жамият ҳаётидаги аҳамиятини ошириш юзасидан таклифлар илгари сурилди.

Шунингдек, ННТларнинг ушбу йўналишда фаолият олиб бораётган экспертлар билан ҳамкорлигини кучайтириш борасида мулоҳазалар билдирилди.

Коррупцияга қарши курашиш агентлиги

 Ахборот хизмати