Жорий йилнинг 9 декабрь куни Олий Мажлис Қонунчилик палатасининг Коррупцияга қарши курашиш ва суд-ҳуқуқ масалалари қўмитасида «Ўзбекистон Республикаси Коррупцияга қарши курашиш агентлигининг Ўзбекистон Республикасида коррупцияга қарши курашиш тўғрисидаги миллий маърузаси» юзасидан йиғилиш бўлиб ўтди.

Йиғилиш давомида Агентлик директори ўринбосари У.Тухташева томонидан коррупциявий хавфларни аниқлаш ва тизимли таҳлил қилиш, уларни келтириб чиқарувчи омилларни бартараф қилиш борасида кўрилаётган чоралар тўғрисида маълумот берди.

Жумладан, коррупцияга қарши курашишнинг ҳуқуқий асослари такомиллаштирилди. Хусусан, ўтган 5 йил давомида коррупциявий омилларга чек қўйишга қаратилган 80 дан ортиқ, шундан бевосита коррупцияга қарши курашиш соҳасини тартибга солувчи 10 дан ортиқ норматив-ҳуқуқий ҳужжатлар қабул қилинди.

Ўзбекистон Республикасининг Коррупцияга қарши курашиш бўйича миллий кенгаши ва унинг ҳудудий кенгашлари, давлат органлари ҳамда ташкилотлари, шу жумладан Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларида коррупцияга қарши ички назорат тузилмалари фаолияти йўлга қўйилди.

«Коррупциядан холи қонунчилик» тамойили асосида қонунчилик ҳужжатлари ва уларнинг лойиҳаларини коррупцияга қарши экспертизадан ўтказиш тартиби жорий этилиб, амалдаги норматив-ҳуқуқий ҳужжатлар босқичма-босқич коррупцияга қарши экспертизадан ўтказилиши белгиланди.

Коррупциявий хавф-хатарлар юқори бўлган соҳалар ва тармоқларда «Коррупциясиз соҳа» (капитал қурилиш, олий таълим, соғлиқни сақлаш, банк ва давлат харидлари тизимларида), «Коррупциясиз ҳудуд» (Давлатобод ва Қарши туманлари) ва “Шаффоф ҳудуд” (Фарғона вилояти) каби лойиҳалар амалга оширилмоқда.

Бундан ташқари, давлатимиз раҳбарининг 2021 йил 16 июндаги ПФ-6247-сон Фармони қабул қилинди ҳамда Фармон билан очиқ маълумотлар сифатида жойлаштирилиши керак бўлган ижтимоий аҳамиятга молик 33 турдаги маълумотларнинг рўйхати тасдиқланди.

Ўзбекистон «Transparency international» ташкилотининг «Коррупцияни қабул қилиш» индексида 2020 йилда 2019 йилдагига нисбатан 7 поғонага, 2021 йилда эса 6 поғонага юқорилаб, индекс баҳосида қаторасига 5 йил давомида барқарор ўсишга эришди.

Йиғилишда Агентлик томонидан Миллий маърузада коррупцияга қарши курашиш ва унинг олдини олиш бўйича илгари сурилаётган таклифлар хусусида ҳам маълумот берилди. Аҳоли ва давлат хизматчиларининг коррупцияга қарши курашиш соҳасидаги билимларини узлуксиз ошириш тизимини жорий қилиш мақсадида “Коррупцияга қарши курашиш виртуал академияси” лойиҳасини амалга ошириш, коррупция хавфи юқори бўлган соҳа ва ҳудудларда “Коррупциясиз соҳа” ва “Коррупциясиз ҳудуд” лойиҳаларини давом эттириш, коррупцияга қарши ички назорат тизими самарадорлигини ошириш, давлат органлари ва ташкилотлари фаолиятининг очиқлигини таъминлаш бўйича “Очиқ, шаффоф ва ҳисобдор ҳудуд” ва “Очиқ, шаффоф ва ҳисобдор вазирлик” лойиҳаларини кенгайтириш шулар жумласидандир. 

Йиғилишда ўтган давр мобайнида амалга оширилган бу каби ишлар ижобий эътироф этилиб, жамиятда коррупцияга қарши муросасиз муносабатни шакллантиришда оммавий ахборот воситалари, фуқаролик жамияти институтлари ва нодавлат-нотижорат ташкилотлари имкониятларидан кўпроқ фойдаланиш мақсадга мувофиқлиги қайд этилди.

Тадбир якунида соҳани такомиллаштириш ҳамда Агентлик томонидан амалга оширилиши лозим бўлган қатор таклифлар ишлаб чиқилди.

Коррупцияга қарши курашиш агентлиги

Ахборот хизмати