Joriy yilning 9-dekabr kuni Oliy Majlis Qonunchilik palatasining Korrupsiyaga qarshi kurashish va sud-huquq masalalari qo‘mitasida “O‘zbekiston Respublikasi Korrupsiyaga qarshi kurashish agentligining O‘zbekiston Respublikasida korrupsiyaga qarshi kurashish to‘g‘risidagi milliy maʼruzasi” yuzasidan yig‘ilish bo‘lib o‘tdi.

Yig‘ilish davomida Agentlik direktori o‘rinbosari U.Tuxtasheva tomonidan korrupsiyaviy xavflarni aniqlash va tizimli tahlil qilish, ularni keltirib chiqaruvchi omillarni bartaraf qilish borasida ko‘rilayotgan choralar to‘g‘risida maʼlumot berdi.

Jumladan, korrupsiyaga qarshi kurashishning huquqiy asoslari takomillashtirildi. Xususan, o‘tgan 5 yil davomida korrupsiyaviy omillarga chek qo‘yishga qaratilgan 80 dan ortiq, shundan bevosita korrupsiyaga qarshi kurashish sohasini tartibga soluvchi 10 dan ortiq normativ-huquqiy hujjatlar qabul qilindi.

O‘zbekiston Respublikasining Korrupsiyaga qarshi kurashish bo‘yicha milliy kengashi va uning hududiy kengashlari, davlat organlari hamda tashkilotlari, shu jumladan Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarida korrupsiyaga qarshi ichki nazorat tuzilmalari faoliyati yo‘lga qo‘yildi.

“Korrupsiyadan xoli qonunchilik” tamoyili asosida qonunchilik hujjatlari va ularning loyihalarini korrupsiyaga qarshi ekspertizadan o‘tkazish tartibi joriy etilib, amaldagi normativ-huquqiy hujjatlar bosqichma-bosqich korrupsiyaga qarshi ekspertizadan o‘tkazilishi belgilandi.

Korrupsiyaviy xavf-xatarlar yuqori bo‘lgan sohalar va tarmoqlarda “Korrupsiyasiz soha” (kapital qurilish, oliy taʼlim, sog‘liqni saqlash, bank va davlat xaridlari tizimlarida), “Korrupsiyasiz hudud” (Davlatobod va Qarshi tumanlari) va “Shaffof hudud” (Farg‘ona viloyati) kabi loyihalar amalga oshirilmoqda.

Bundan tashqari, davlatimiz rahbarining 2021-yil 16-iyundagi PF-6247-son Farmoni qabul qilindi hamda Farmon bilan ochiq maʼlumotlar sifatida joylashtirilishi kerak bo‘lgan ijtimoiy ahamiyatga molik 33 turdagi maʼlumotlarning ro‘yxati tasdiqlandi.

O‘zbekiston “Transparency international” tashkilotining “Korrupsiyani qabul qilish” indeksida 2020-yilda 2019-yildagiga nisbatan 7 pog‘onaga, 2021-yilda esa 6 pog‘onaga yuqorilab, indeks bahosida qatorasiga 5 yil davomida barqaror o‘sishga erishdi.

Yig‘ilishda Agentlik tomonidan Milliy maʼruzada korrupsiyaga qarshi kurashish va uning oldini olish bo‘yicha ilgari surilayotgan takliflar xususida ham maʼlumot berildi. Aholi va davlat xizmatchilarining korrupsiyaga qarshi kurashish sohasidagi bilimlarini uzluksiz oshirish tizimini joriy qilish maqsadida “Korrupsiyaga qarshi kurashish virtual akademiyasi” loyihasini amalga oshirish, korrupsiya xavfi yuqori bo‘lgan soha va hududlarda “Korrupsiyasiz soha” va “Korrupsiyasiz hudud” loyihalarini davom ettirish, korrupsiyaga qarshi ichki nazorat tizimi samaradorligini oshirish, davlat organlari va tashkilotlari faoliyatining ochiqligini taʼminlash bo‘yicha “Ochiq, shaffof va hisobdor hudud” va “Ochiq, shaffof va hisobdor vazirlik” loyihalarini kengaytirish shular jumlasidandir. 

Yig‘ilishda o‘tgan davr mobaynida amalga oshirilgan bu kabi ishlar ijobiy eʼtirof etilib, jamiyatda korrupsiyaga qarshi murosasiz munosabatni shakllantirishda ommaviy axborot vositalari, fuqarolik jamiyati institutlari va nodavlat-notijorat tashkilotlari imkoniyatlaridan ko‘proq foydalanish maqsadga muvofiqligi qayd etildi.

Tadbir yakunida sohani takomillashtirish hamda Agentlik tomonidan amalga oshirilishi lozim bo‘lgan qator takliflar ishlab chiqildi.

Korrupsiyaga qarshi kurashish agentligi

Axborot xizmati