Бугун, 14 декабрь ИТ Парк мажмуасида айни мавзуда ўқув-семинари бўлиб ўтди.

Семинарда Ахборот технологиялари ва коммуникацияларини ривожлантириш вазирлиги, Президент ҳузуридаги давлат хизматини ривожлантириш агентлиги раҳбарияти, Коррупцияга қарши курашиш агентлиги, Адлия вазирлиги, Халқаро OS “CERT International” академияси, TUV Thuringen-Germaniya, “CERT International” – Словакия Халқаро Сертификатлаш органлари ходимлари ҳам иштирок этган тадбирда асосий эътибор коррупцион хавф-хатарлар ва уларнинг олдини олиш масаласига қаратилди.

Агентлик масъул ходимлари иштирокчиларни коррупциявий хавф-хатарларни аниқлаш ва баҳолашнинг ҳуқуқий асослари, мазкур йўналишда Агентлик томонидан олиб борилаётган чора-тадбирлар билан таништириб ўтди. 

Таъкидланганидек, 2022 йил 12 январда қабул қилинган ПҚ-81-сон қарор билан коррупцияга қарши курашиш ишларининг самарадорлигини рейтинг баҳолаш индикаторлари белгиланган бўлиб, индикаторлардан бири сифатида коррупциявий хавф-хатарларни аниқлаш, баҳолаш ва уларни камайтириш бўйича чора-тадбирларнинг амалга оширилганлиги кўрсатилган.

Маълумки, 2022 йил 11 майдаги ПҚ-240-сон қарор билан жорий йилнинг 1 сентябридан бошлаб, давлат ҳокимияти ва бошқаруви органлари, шу жумладан уларнинг ҳудудий бўлинмалари, давлат унитар корхоналари ва муассасалари, давлат улуши 50 фоиздан юқори ташкилотларнинг фаолиятида коррупциявий хавф-хатарларни мажбурий баҳолаш тартиби белгиланди.

Тадбирда коррупциявий хавф-хатарларни аниқлаш, баҳолаш тартиблари, мезонлари, даврийлиги, коррупциявий хатарлар харитаси, қайси ҳолатларда баҳолаш амалга оширилиши, баҳолаш натижалари бўйича амалга ошириладиган чора-тадбирлар тўғрисида батафсил маълумот берилди.

Бундан ташқари, коррупциявий хавф-хатарларни баҳолашдан кутилаётган натижалар, комплаенс-назорати тузилмасининг самараси ва истиқболдаги ўрни, коррупцияга қарши курашиш соҳасидаги халқаро стандартлари мазмун-моҳияти ва уларни ташкилотга жорий қилишнинг аҳамияти тўғрисида маърузалар тингланди.

Коррупцияга қарши курашиш агентлиги

Ахборот хизмати