Bugun, 14-dekabr IT Park majmuasida ayni mavzuda o‘quv-seminari bo‘lib o‘tdi.

Seminarda Axborot texnologiyalari va kommunikatsiyalarini rivojlantirish vazirligi, Korrupsiyaga qarshi kurashish agentligi, Prezident huzuridagi davlat xizmatini rivojlantirish agentligi, Adliya vazirligi, Xalqaro OS “CERT International” akademiyasi, TUV Thuringen-Germaniya, “CERT International” – Slovakiya Xalqaro Sertifikatlash organlari masʼul xodimlari ham ishtirok etgan tadbirda asosiy eʼtibor korrupsion xavf-xatarlar va ularning oldini olish masalasiga qaratildi.

Agentlik masʼul xodimlari ishtirokchilarni korrupsiyaviy xavf-xatarlarni aniqlash va baholashning huquqiy asoslari, mazkur  yo‘nalishda Agentlik tomonidan olib borilayotgan chora-tadbirlar bilan tanishtirib o‘tdi. 

Taʼkidlanganidek, 2022-yil 12-yanvarda qabul qilingan PQ-81-son qaror bilan korrupsiyaga qarshi kurashish ishlarining samaradorligini reyting baholash indikatorlari belgilangan bo‘lib, indikatorlardan biri sifatida korrupsiyaviy xavf-xatarlarni aniqlash, baholash va ularni kamaytirish bo‘yicha chora-tadbirlarning amalga oshirilganligi ko‘rsatilgan.

Maʼlumki, 2022-yil 11-maydagi PQ-240-son qaror bilan joriy yilning 1-sentyabridan boshlab, davlat hokimiyati va boshqaruvi organlari, shu jumladan ularning hududiy bo‘linmalari, davlat unitar korxonalari va muassasalari, davlat ulushi 50 foizdan yuqori tashkilotlarning faoliyatida korrupsiyaviy xavf-xatarlarni majburiy baholash tartibi belgilandi.

Tadbirda korrupsiyaviy xavf-xatarlarni aniqlash, baholash tartiblari, mezonlari, davriyligi, korrupsiyaviy xatarlar xaritasi, qaysi holatlarda baholash amalga oshirilishi, baholash natijalari bo‘yicha amalga oshiriladigan chora-tadbirlar to‘g‘risida batafsil maʼlumot berildi.

Bundan tashqari, korrupsiyaviy xavf-xatarlarni baholashdan kutilayotgan natijalar, komplayens-nazorati tuzilmasining samarasi va  istiqboldagi o‘rni, korrupsiyaga qarshi kurashish sohasidagi xalqaro standartlari mazmun-mohiyati va ularni tashkilotga joriy qilishning ahamiyati to‘g‘risida maʼruzalar tinglandi.

Korrupsiyaga qarshi kurashish agentligi

Axborot xizmati