Маълумки, Ўзбекистон Республикаси Президентининг бир қатор Қарорларига мувофиқ Коррупцияга қарши курашиш агентлигига инвестиция лойиҳаларини амалга оширишда халқаро молия институтлари томонидан ажратилаётган кредит маблағларидан фойдаланиш жараёнида очиқлик ва ошкораликни таъминлаш устидан назоратни ўрнатиш вазифаси юклатилган.

Хусусан, Агентлик томонидан бугунги кунга қадар 15 та йирик ва муҳим инвестиция лойиҳаларининг амалга оширилиши жараёнида очиқлик ва ошкораликнинг таъминланиши мониторинг қилиб борилмоқда.

Жумладан, масъул давлат органлари ва ташкилотлари томонидан лойиҳалар доирасида амалга оширилиши режалаштирилган ишларнинг барча босқичларини кенг жамоатчиликка очиқ эълон қилиб борилиши , шу жумладан, режалаштирилган иш ҳажми ва эришиладиган натижалар, ажратилган кредит маблағлари ва ундаги халқаро молия институтларининг улуши ва бошқа маълумотлар,лойиҳани амалга ошириш доирасида қабул қилинган ҳужжатларнинг очиқлиги, ўтказилган тендер ва танловлар тўғрисидаги маълумотларнинг расмий веб-сайт ва бошқа ахборот ресурсларига жойлаштирилиши таъминланмоқда.

Бугунги кунда, қуйидаги лойиҳалар юзасидан маъул вазирлик ва идоралар расмий веб-сайтларида алоҳида бўлим ёки саҳифалар ташкил этилиб, амалга оширилган ишлар юзасидан маълумотлар доимий янгиланиб борилмоқда.

Ўзбекистон Республикаси Президентининг 2022-йил 10-мартдаги
ПҚ-159-сон Қарорига мувофиқ Самарқанд вилояти, Ўзбекистон Республикаси Президентининг 2022-йил 2-августдаги ПҚ-342-сон Қарорига мувофиқ Наманган ва Сурхондарё вилоятларида ичимлик сув ҳамда оқова сув тизимларини ривожлантириш бўйича қурилиш-таъмирлаш ишларини олиб бориш ва машина ва ускуналар сотиб олиш назарда тутилган.

“Ўзсувтаъминот” АЖ расмий веб-сайтида лойиҳалар юзасидан маълумотлар (ажратилган маблағларни ўзлаштириш режаси, ўзлаштирилган маблағлар, ҳудудлар кесимида режалаштирилган ишлар, лойиҳани бошқариш бўйича консультант компанияни танлаш юзасидан амалга оширилган ишлар тўғрисида маълумотлар) киритилиши таъминланди.

Ўзбекистон Республикаси Президентининг 2022-йил 27-сентябрдаги
ПҚ-381-сон Қарорига мувофиқ, Оролбўйи минтақасидаги суғориладиган ерларда қишлоқ хўжалигини барқарор ривожлантиришни таъминлаш, Қорақалпоғистон Республикаси, Бухоро, Сурхондарё ҳамда Хоразм вилоятларида сув ва ер ресурсларидан самарали фойдаланиш мақсадида машина ва жиҳозлар сотиб олиш, қурилиш-монтаж ишларини амалга ошириш назарда тутилган.

Ўрганиш давомида Сув хўжалигида хорижий инвестиция лойиҳаларини амалга ошириш маркази расмий веб-сайтида лойиҳа юзасидан алоҳида саҳифа ташкил этилиб, лойиҳа тўғрисида маълумотлар киритлиши таъминланди.

Ўзбекистон Республикаси Президентининг 2021-йил 27-майдаги
ПҚ-5129-сон Қарорига мувофиқ республикадаги 7 та муассасада халқаро стандартларга жавоб берувчи миллий референц лабораторияларни яратиш, 475 та санитария-эпидемиология хизмати муассасаларини реконструкция қилиш, капитал таъмирлаш ва жиҳозлаш, COVID-19 инфекциясини аниқлаш учун 500 мингта тест синовларини харид қилиш, қодир лаборатория мажмуаларининг моддий-техника базасини ривожлантириш ҳамда 1000 та тез тиббий ёрдам махсус автотранспорт воситасини харид қилиш назарда тутилган.

Лойиҳага оид маълумотлар Санитария-эпидемиологик осойишталик ва жамоат саломатлиги хизматининг расмий веб-сайтида эълон қилиниши таъминланди.

Шу билан бирга, Агентлик томонидан 2022-йилнинг декабрь ойида қайд этилган лойиҳалар юзасидан расмий веб-сайтлар, ижтимоий тармоқларива ОАВда эълон қилинган материаллар умумлаштирилиб ўрганилганда, айрим масъул вазирлик ва идоралар томонидан маълумотларни эълон қилиб боришда хато ва камчиликларга йўл қўйилганлиги аниқланди.

Мисол учун, Ўзбекистон Республикаси Президентининг 2021-йил
16-декабрдаги ПҚ-54-сон Қарорига мувофиқ томорқа ер эгаларига гаровсиз кредит ажратиш учун 100 млн. АҚШ доллари эквивалентида маблағ ажратилган. Қарор ижросини ташкил қилишга масъул этиб Ўзбекистон фермер, деҳқон хўжаликлари ва томорқа ер эгалари кенгаши ҳамда бошқа бир қатор вазирлик ва идоралар белгиланган.

Ўзбекистон фермер, деҳқон хўжаликлари ва томорқа ер эгалари кенгашининг маълумотига асосан 2022-йилнинг 1-июнь ҳолатига тижорат банклари томонидан маблағларнинг 240,4 млрд сўм қисми томорқа ер эгаларига кредит тариқасида, 38 млрд сўм томорқа хизмати корхоналари, фермер хўжаликлари, ишлаб чиқариш кооперативларининг лойиҳалари учун, 71 млрд сўм томорқа хизмати кластерлари ташкил этиш учун ажратилган.

Ўрганиш кунига қадар, Қарор доирасида ажратилаётган маблағларнинг сарфланиши, амалга оширилган ишлар ҳолати, қабул қилинган ҳужжатлар, ўтказилган тендер ва танловлар юзасидан масъул вазирлик ва идоралар томонидан расмий веб-сайтларда бирор бир маълумот эълон қилинмаган.

Ўзбекистон Республикаси Президентининг 2022-йил 18-майдаги
ПҚ-249-сон Қарорига мувофиқ Лойиҳага асосан Қорақалпоғистон Республикаси, вилоятлар ва Тошкент шаҳрида 2022-йилда жами 2606 км цемент-бетон қопламали ички йўлларни қуриш наразда тутилган ҳамда ички йўлларни қуриш ишларини молиялаштириш учун турли манбалардан жами 700,5 млрд сўм ҳамда 40 млн АҚШ доллари ажратилган.

Қарор ижросини ташкил қилишга масъул этиб Қорақалпоғистон Республикаси Вазирлар Кенгаши Раиси, вилоятлар ва Тошкент шаҳар ҳокимлари белгиланган бўлиб, маҳаллий давлат бошқаруви органлари расмий веб-сайтлари ва ижтимоий тармоқлардаги саҳифаларида Қарор доирасида ажратилаётган маблағларнинг сарфланиши, амалга оширилган ишлар ҳолати, қабул қилинган ҳужжатлар, ўтказилган тендер ва танловлар юзасидан маълумотлар етарлича очиқланмаган.

Агентлик томонидан юқоридаги инвестиция лойиҳалари юзасидан масъул этиб белгиланган вазирлик ва идораларга лойиҳалар доирасида ажратилиши режалаштирилган маблағларнинг очиқлиги ва шаффофлигини таъминлашга қаратилган тавсия ва кўрсатмалар юборилди.

Агентлик лойиҳалар доирасида ажратилган маблағларнинг мақсадли ишлатилиши жараёнида очиқлик ва ошкораликни таъминлаш устидан назорат ишлари давом эттирилади.

Коррупцияга қарши курашиш агентлиги