Ma’lumki, O‘zbekiston Respublikasi Prezidentining bir qator Qarorlariga muvofiq Korrupsiyaga qarshi kurashish agentligiga investitsiya loyihalarini amalga oshirishda xalqaro moliya institutlari tomonidan ajratilayotgan kredit mablag‘laridan foydalanish jarayonida ochiqlik va oshkoralikni ta’minlash ustidan nazoratni o‘rnatish vazifasi yuklatilgan.

Xususan, Agentlik tomonidan bugungi kunga qadar 15 ta yirik va muhim investitsiya loyihalarining amalga oshirilishi jarayonida ochiqlik va oshkoralikning ta’minlanishi monitoring qilib borilmoqda.

Jumladan, mas’ul davlat organlari va tashkilotlari tomonidan loyihalar doirasida amalga oshirilishi rejalashtirilgan ishlarning barcha bosqichlarini keng jamoatchilikka ochiq e’lon qilib borilishi , shu jumladan, rejalashtirilgan ish hajmi va erishiladigan natijalar, ajratilgan kredit mablag‘lari va undagi xalqaro moliya institutlarining ulushi va boshqa ma’lumotlar,loyihani amalga oshirish doirasida qabul qilingan hujjatlarning ochiqligi, o‘tkazilgan tender va tanlovlar to‘g‘risidagi ma’lumotlarning rasmiy veb-sayt va boshqa axborot resurslariga joylashtirilishi ta’minlanmoqda.

Bugungi kunda, quyidagi loyihalar yuzasidan ma’ul vazirlik va idoralar rasmiy veb-saytlarida alohida bo‘lim yoki sahifalar tashkil etilib, amalga oshirilgan ishlar yuzasidan ma’lumotlar doimiy yangilanib borilmoqda.

O‘zbekiston Respublikasi Prezidentining 2022-yil 10-martdagi PQ-159-son Qaroriga muvofiq Samarqand viloyati, O‘zbekiston Respublikasi Prezidentining 2022-yil 2-avgustdagi PQ-342-son Qaroriga muvofiq Namangan va Surxondaryo viloyatlarida ichimlik suv hamda oqova suv tizimlarini rivojlantirish bo‘yicha qurilish-ta’mirlash ishlarini olib borish va mashina va uskunalar sotib olish nazarda tutilgan.

“O‘zsuvta’minot” AJ rasmiy veb-saytida loyihalar yuzasidan ma’lumotlar (ajratilgan mablag‘larni o‘zlashtirish rejasi, o‘zlashtirilgan mablag‘lar, hududlar kesimida rejalashtirilgan ishlar, loyihani boshqarish bo‘yicha konsultant kompaniyani tanlash yuzasidan amalga oshirilgan ishlar to‘g‘risida ma’lumotlar) kiritilishi ta’minlandi.

O‘zbekiston Respublikasi Prezidentining 2022-yil 27-sentabrdagi PQ-381-son Qaroriga muvofiq, Orolbo‘yi mintaqasidagi sug‘oriladigan yerlarda qishloq xo‘jaligini barqaror rivojlantirishni ta’minlash, Qoraqalpog‘iston Respublikasi, Buxoro, Surxondaryo hamda Xorazm viloyatlarida suv va yer resurslaridan samarali foydalanish maqsadida mashina va jihozlar sotib olish, qurilish-montaj ishlarini amalga oshirish nazarda tutilgan.

O‘rganish davomida Suv xo'jaligida xorijiy investitsiya loyihalarini amalga oshirish markazi rasmiy veb-saytida loyiha yuzasidan alohida sahifa tashkil etilib, loyiha to‘g‘risida ma’lumotlar kiritlishi ta’minlandi.

O‘zbekiston Respublikasi Prezidentining 2021-yil 27-maydagi PQ-5129-son Qaroriga muvofiq respublikadagi 7 ta muassasada xalqaro standartlarga javob beruvchi milliy referens laboratoriyalarni yaratish, 475 ta sanitariya-epidemiologiya xizmati muassasalarini rekonstruksiya qilish, kapital ta’mirlash va jihozlash, COVID-19 infeksiyasini aniqlash uchun 500 mingta test sinovlarini xarid qilish, qodir laboratoriya majmualarining moddiy-texnika bazasini rivojlantirish hamda 1000 ta tez tibbiy yordam maxsus avtotransport vositasini xarid qilish nazarda tutilgan.

Loyihaga oid ma’lumotlar Sanitariya-epidemiologik osoyishtalik va jamoat salomatligi xizmatining rasmiy veb-saytida e’lon qilinishi ta’minlandi.

Shu bilan birga, Agentlik tomonidan 2022-yilning dekabr oyida qayd etilgan loyihalar yuzasidan rasmiy veb-saytlar, ijtimoiy tarmoqlariva OAVda e’lon qilingan materiallar umumlashtirilib o‘rganilganda, ayrim mas’ul vazirlik va idoralar tomonidan ma’lumotlarni e’lon qilib borishda xato va kamchiliklarga yo‘l qo‘yilganligi aniqlandi.

Misol uchun, O‘zbekiston Respublikasi Prezidentining 2021-yil 16-dekabrdagi PQ-54-son Qaroriga muvofiq tomorqa yer egalariga garovsiz kredit ajratish uchun 100 mln. AQSh dollari ekvivalentida mablag‘ ajratilgan. Qaror ijrosini tashkil qilishga mas’ul etib O‘zbekiston fermer, dehqon xo‘jaliklari va tomorqa yer egalari kengashi hamda boshqa bir qator vazirlik va idoralar belgilangan.

O‘zbekiston fermer, dehqon xo‘jaliklari va tomorqa yer egalari kengashining ma’lumotiga asosan 2022-yilning 1-iyun holatiga tijorat banklari tomonidan mablag‘larning 240,4 mlrd so‘m qismi tomorqa yer egalariga kredit tariqasida, 38 mlrd so‘m tomorqa xizmati korxonalari, fermer xo‘jaliklari, ishlab chiqarish kooperativlarining loyihalari uchun, 71 mlrd so‘m tomorqa xizmati klasterlari tashkil etish uchun ajratilgan.

O‘rganish kuniga qadar, Qaror doirasida ajratilayotgan mablag‘larning sarflanishi, amalga oshirilgan ishlar holati, qabul qilingan hujjatlar, o‘tkazilgan tender va tanlovlar yuzasidan mas’ul vazirlik va idoralar tomonidan rasmiy veb-saytlarda biror bir ma’lumot e’lon qilinmagan.

O‘zbekiston Respublikasi Prezidentining 2022-yil 18-maydagi PQ-249-son Qaroriga muvofiq Loyihaga asosan Qoraqalpog‘iston Respublikasi, viloyatlar va Toshkent shahrida 2022-yilda jami 2606 km sement-beton qoplamali ichki yo‘llarni qurish narazda tutilgan hamda ichki yo‘llarni qurish ishlarini moliyalashtirish uchun turli manbalardan jami 700,5 mlrd so‘m hamda 40 mln AQSh dollari ajratilgan.

Qaror ijrosini tashkil qilishga mas’ul etib Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari belgilangan bo‘lib, mahalliy davlat boshqaruvi organlari rasmiy veb-saytlari va ijtimoiy tarmoqlardagi sahifalarida Qaror doirasida ajratilayotgan mablag‘larning sarflanishi, amalga oshirilgan ishlar holati, qabul qilingan hujjatlar, o‘tkazilgan tender va tanlovlar yuzasidan ma’lumotlar yetarlicha ochiqlanmagan.

Agentlik tomonidan yuqoridagi investitsiya loyihalari yuzasidan mas’ul etib belgilangan vazirlik va idoralarga loyihalar doirasida ajratilishi rejalashtirilgan mablag‘larning ochiqligi va shaffofligini ta’minlashga qaratilgan tavsiya va ko‘rsatmalar yuborildi.

Agentlik loyihalar doirasida ajratilgan mablag‘larning maqsadli ishlatilishi jarayonida ochiqlik va oshkoralikni ta’minlash ustidan nazorat ishlari davom ettiriladi.