Коррупцияга қарши курашиш агентлиги томонидан Сирдарё вилоятида ўтказилган ўрганишда оилавий тадбиркорлик дастурлари доирасида 3 та (Агробанк , Халқ банк, Микрокредитбанк) тижорат банки томонидан 2022 йил 9 ойида ажратилган кредит маблағлари ҳисобидан 19 та таъминотчига 642 та мижоз бўйича 16,6 млрд.сўм ўтказиб берилганлиги, ҳақиқатда таъминотчиларда ушбу кредит йўналиши бўйича етказиб берилган товарлар кирим ҳужжатлари мавжуд эмаслиги, яъни ажратилган кредитлар мақсадсиз йўналтирилганлиги аниқланган.

Ўрганиш натижаси бўйича тўпланган ҳужжатлар қонуний қарор қабул қилиш учун Агентлик томонидан Бош прокуратурага юборилган.

Сирдарё вилоят прокуратураси томонидан ўтказилган терговга қадар текширув натижаси бўйича 642 нафар фуқарога ажратилган ва 19 та таъминотчига ўтказилган жуда кўп миқдордаги 16,6 млрд.сўм кредит маблағлари эвазига маҳсулот етказиб берилмасдан нақдлаштириб, мақсадсиз ишлатиш йўли билан талон-торож қилинганлиги ҳолатлари аниқланиб, 2023 йил 14 январь куни ҳоким ёрдамчилари ва 19 та таъминотчи ҳамда “Агро банк”АТБ,  АТ “Халқ банк”, “Микрокредит банк” АТБ туман-шаҳар филиаллари мансабдор шахслари ва бошқаларга нисбатан Ўзбекистон Республикаси Жиноят кодексининг 167-моддаси 3-қисми “а” банди (ўзлаштириш ёки растрата йўли билан талон-торож қилиш) билан жиноят иши қўзғатилган. Ҳозирда тергов ҳаракатлари олиб борилмоқда.

Коррупцияга қарши курашиш агентлиги

Ахборот хизмати