Бугун Коррупцияга қарши курашиш агентлиги ва БМТ ТДнинг Ўзбекистондаги ваколатхонаси ўртасида 2022 йилда амалга оширилган “Ўзбекистонда Коррупцияга қарши курашиш агентлиги ролини ошириш учун фуқаролик маконини, аёллар ва ёшлар овозини мустаҳкамлаш” ҳамкорлик лойиҳаси иштирокчиларининг якуний йиғилиши бўлиб ўтди.

БМТ Тараққиёт Дастурининг Ўзбекистондаги доимий вакили Матильда Димовска мазкур Лойиҳа инклюзивлиги ҳамда коррупцияга қарши курашишда фуқароларнинг ижтимоий заиф қатламлари овозини кучайтиришга йўналтирилганлиги билан ўз долзарблигини кўрсатганлигини таъкидлади ва ўтган вақт мобайнида Агентлик томонидан амалга оширилган ишларни юқори баҳолади.

Лойиҳа доирасида Ўзбекистонда коррупцияга қарши курашиш соҳасига ёшларни кенг жалб этиш, нодавлат ташкилотлари салоҳиятини ишга солишда дуч келаётган муаммоларини аниқлаш ва уларни бартараф этиш чораларини кўриш, шунингдек давлат хизматида аёллар ролини ошириш каби муҳим масалалар кун тартибида бўлди.

Ҳамкорлик лойиҳаси доирасида халқаро эксперт иштирокида коррупцияга қарши курашишда илғор хорижий тажриба ўрганилди ва таҳлил қилинди. Шунингдек, Лойиҳа доирасида 66 та давлат идораси ва 107 та нодавлат ташкилотларининг 1000 нафардан ортиқ аёллар ва ёшлар вакиллари коррупцияга қарши илғор тажриба ва кўникмага эга бўлишди. 3 та ННТлар лойиҳалари учун 20.000 АҚШ доллари миқдорида кичик грантлар ажратилди.

Шу билан бир қаторда, Лойиҳа маблағлари кўмагида Бухорода коворкинг - марказ, Сирдарёда ёшлар учун коррупцияга қарши курашиш мактаби, қишлоқ ҳудудларда ёшлар ва мактаб ўқитувчилари учун коррупцияга қарши курашиш бўйича тренинглар ва бошқа қатор тадбирлар ўтказилди.

Агентлик ва БМТ Тараққиёт Дастури вакиллари келгусида мазкур йўналишда ҳамкорликни давом эттириш ҳамда Лойиҳа натижалари бўйича қатор якуний тавсиялар ишлаб чиқишга келишиб олдилар.

Коррупцияга қарши курашиш агентлиги

Ахборот хизмати