Bugun Korrupsiyaga qarshi kurashish agentligi va BMT TDning O‘zbekistondagi vakolatxonasi o‘rtasida 2022 yilda amalga oshirilgan “O‘zbekistonda Korrupsiyaga qarshi kurashish agentligi rolini oshirish uchun fuqarolik makonini, ayollar va yoshlar ovozini mustahkamlash” hamkorlik loyihasi ishtirokchilarining yakuniy yig‘ilishi bo‘lib o‘tdi.

BMT Taraqqiyot Dasturining O‘zbekistondagi doimiy vakili Matilda Dimovska mazkur Loyiha inklyuzivligi hamda korrupsiyaga qarshi kurashishda fuqarolarning ijtimoiy zaif qatlamlari ovozini kuchaytirishga yo‘naltirilganligi bilan o‘z dolzarbligini ko‘rsatganligini taʼkidladi va o‘tgan vaqt mobaynida Agentlik tomonidan amalga oshirilgan ishlarni yuqori baholadi.

Loyiha doirasida O‘zbekistonda korrupsiyaga qarshi kurashish sohasiga yoshlarni keng jalb etish, nodavlat tashkilotlari salohiyatini ishga solishda duch kelayotgan muammolarini aniqlash va ularni bartaraf etish choralarini ko‘rish, shuningdek davlat xizmatida ayollar rolini oshirish kabi muhim masalalar kun tartibida bo‘ldi.

Hamkorlik loyihasi doirasida xalqaro ekspert ishtirokida korrupsiyaga qarshi kurashishda ilg‘or xorijiy tajriba o‘rganildi va tahlil qilindi. Shuningdek, Loyiha doirasida 66 ta davlat idorasi va 107 ta nodavlat tashkilotlarining 1000 nafardan ortiq ayollar va yoshlar vakillari korrupsiyaga qarshi ilg‘or tajriba va ko‘nikmaga ega bo‘lishdi. 3 ta NNTlar loyihalari uchun 20.000 AQSH dollari miqdorida kichik grantlar ajratildi.

Shu bilan bir qatorda, Loyiha mablag‘lari ko‘magida Buxoroda kovorking - markaz, Sirdaryoda yoshlar uchun korrupsiyaga qarshi kurashish maktabi, qishloq hududlarda yoshlar va maktab o‘qituvchilari uchun korrupsiyaga qarshi kurashish bo‘yicha treninglar va boshqa qator tadbirlar o‘tkazildi.

Agentlik va BMT Taraqqiyot Dasturi vakillari kelgusida mazkur yo‘nalishda hamkorlikni davom ettirish hamda Loyiha natijalari bo‘yicha qator yakuniy tavsiyalar ishlab chiqishga kelishib oldilar.

 

Korrupsiyaga qarshi kurashish agentligi

Axborot xizmati