Фуқаро А.нинг Ўзбекистон Республикаси Коррупцияга қарши курашиш агентлигига Ўзбекистон Республикаси Қишлоқ хўжалиги вазирлиги ҳузуридаги Қишлоқ хўжалиги экинлари навларини синаш маркази фаолиятидаги қонунбузилиши ҳолатларидан норози бўлиб йўллаган мурожаати асосида белгиланган тартибда ўрганиш ўтказилди.

Ўрганиш якунида ишчи гуруҳ томонидан Марказ фаолияти билан боғлиқ бир қатор хато ва камчиликларга йўл қўйилганлиги аниқланди.

Жумладан, экин навларини давлат реестрига киритиш, ажратилган тажриба ер майдонларидан фойдаланиш ҳамда меҳнат қонунчилиги билан боғлиқ қонунбузилиши ҳолатлари, давлат хизматларини кўрсатиш учун тўловларнинг ундирилмаганлиги, иш ҳақи ва бошқа тўловларни нотўғри тўланганлик ҳолатлари фош этилди.

Ўрганиш якуни бўйича тўпланган ҳужжатлар қонуний баҳо бериш учун Ўзбекистон Республикаси Бош прокуратурасига юборилди.

Ҳозирда тўпланган ҳужжатлар юзасидан прокуратура идоралари томонидан Жиноят кодексининг 167-моддаси 3-қисми “а” банди, 205-моддаси 2-қисми “а” банди, 207-моддаси 1-қисми ва 209-моддаси 1-қисми билан жиноят иши қўзғатилиб, тергов ҳаракатлари олиб борилмоқда.

Коррупцияга қарши курашиш агентлиги

Ахборот хизмати