Жорий йилнинг 27 февраль куни Коррупцияга қарши курашиш агентлиги раҳбарияти ва АҚШ Федерал тергов бюро вакили Френк Танси ўртасида учрашув ташкил этилди. 

Учрашувни ташкил этишдан асосий мақсад коррупцияга қарши курашиш соҳасидаги ҳамкорликнинг истиқболли йўналишларини муҳокама қилишдан иборат бўлди. 

Маълумот учун: Федерал тергов бюроси (ФТБ) ички разведка агентлиги ва шу билан бирга АҚШнинг федерал ҳуқуқни муҳофаза қилиш идораси бўлиб, унинг асосий вазифаларидан бири фуқаролик ҳуқуқларини ҳимоя қилиш ҳамда барча даражадаги давлат коррупциясига қарши курашишни амалга ошириш ҳисобланади. 

Учрашув давомида хорижий тарафга Агентлик фаолияти ҳақида маълумот берилиб, комплаенс назорат тузилмаларининг ишга туширилиши, давлат органларининг очиқлигини таъминлаш борасида олиб борилаётган ишлар, халқаро стандартларни миллий қонунчиликка имплементация қилиш бўйича олиб борилаётган ишларга тўхталиб ўтилди. 

Муҳокамалар давомида Агентлик вакиллари томонидан Ўзбекистондаги коррупцияга қарши курашиш соҳасида фаолият юритувчи ташкилотлар учун малака ошириш тадбирларини (ўқув курси, семинар, тренинг шаклида) ҳамкорликда чиқиш ва ташкил этиш бўйича таклифлар илгари сурилди.  
 

Учрашув сўнгида томонлар таклиф этилган ҳамкорлик йўналишларида фаолият олиб боришга юқори хоҳиш билдиришди.