Joriy yilning 27 fevral kuni Korrupsiyaga qarshi kurashish agentligi rahbariyati va AQSH Federal tergov byuro vakili Frenk Tansi o‘rtasida uchrashuv tashkil etildi. 

Uchrashuvni tashkil etishdan asosiy maqsad korrupsiyaga qarshi kurashish sohasidagi hamkorlikning istiqbolli yo‘nalishlarini muhokama qilishdan iborat bo‘ldi. 

Ma’lumot uchun: Federal tergov byurosi (FTB) ichki razvedka agentligi va shu bilan birga AQShning federal huquqni muhofaza qilish idorasi bo‘lib, uning asosiy vazifalaridan biri fuqarolik huquqlarini himoya qilish hamda barcha darajadagi davlat korrupsiyasiga qarshi kurashishni amalga oshirish hisoblanadi. 

Uchrashuv davomida xorijiy tarafga Agentlik faoliyati haqida ma’lumot berilib, komplayens nazorat tuzilmalarining ishga tushirilishi, davlat organlarining ochiqligini ta’minlash borasida olib borilayotgan ishlar, xalqaro standartlarni milliy qonunchilikka implementatsiya qilish bo‘yicha olib borilayotgan ishlarga to‘xtalib o‘tildi. 

Muhokamalar davomida Agentlik vakillari tomonidan O‘zbekistondagi korrupsiyaga qarshi kurashish sohasida faoliyat yurituvchi tashkilotlar uchun malaka oshirish tadbirlarini (o‘quv kursi, seminar, trening shaklida) hamkorlikda chiqish va tashkil etish bo‘yicha takliflar ilgari surildi. 

Uchrashuv so‘ngida tomonlar taklif etilgan hamkorlik yo‘nalishlarida faoliyat olib borishga yuqori xohish bildirishdi.