Жорий йилнинг 24 февраль куни Коррупцияга қарши курашиш агентлигида Ўзбекистон Республикаси Президентининг 2023 йил 16 январдаги “Одил судловга эришиш имкониятларини янада кенгайтириш ва судлар фаолияти самарадорлигини оширишга доир қўшимча чора-тадбирлар тўғрисида”ги ПФ–11-сон Фармонининг мазмун-моҳияти ва яқин истиқболда суд ҳокимияти тизимида амалга оширилиши кўзланган ислоҳотларга бағишланган ўқув-семинар ташкил этилди.

Мазкур тадбир Агентлик ҳамда Судьялар олий кенгаши ўртасида соҳада коррупциянинг олдини олиш ва унга қарши курашиш борасида ўзаро манфаатли ҳамкорликни амалга ошириш мақсадида 2022 йилда имзоланган Ҳамкорлик меморандуми доирасида ўтказилиб келинаётган тадбирларнинг навбатдагисидир.

Ўқув-семинарда Агентлик ҳамда Судьялар олий кенгашининг масъул ходимлари иштирок этди.

Тадбирда давлат раҳбарининг 2023 йил 16 январдаги ПФ–11-сон Фармонида белгиланган вазифалар, ундан кўзланган мақсад, медиация институтини ривожлантириш муаммолари, судга ҳурматсизлик қилиш ҳолатларининг олдини олиш, одил судловни амалга ошириш фаолиятига аралашганлик учун жавобгарликни кучайтириш, судьянинг дахлсизлиги масалаларида сўз юритилди.

Шунингдек, Ихтисослашган прокурорлар корпуси, 2023 — 2026 йилларга мўлжалланган суд тизимини сифат жиҳатидан янги босқичга олиб чиқишнинг қисқа муддатли стратегиясини амалга ошириш бўйича ҳаракатлар дастури ҳақида ҳам батафсил тақдимот қилинди.

Тадбир давомида Агентлик ходимлари томонидан суд ҳокимияти соҳасида коррупциянинг олдини олиш ва унга қарши курашиш борасида амалга оширилаётган ишлар ва муаммолар ҳақида фикр ва мулоҳазалар билдирилди.

Коррупцияга қарши курашиш агентлиги

Ахборот хизмати