Жорий йилнинг 3 март куни Коррупцияга қарши курашиш агентлиги ходимлари учун зилзила ва унинг оқибатлари, ёнғин содир бўлганда уни бартараф этиш чораларини кўриш юзасидан Тошкент шаҳар Фавқулодда вазиятлар бошқармаси Ҳаёт фаолияти хавфсизлиги ўқув маркази, Яккасарой туман Фавқулодда вазиятлар бўлинмаси мутахассислари иштирокида ўқув машғулоти ўтказилди.

Таъкидланганидек, Ўзбекистон Республикаси Президентининг 2022 йил 30 майдаги “Ўзбекистон Республикасининг сейсмик хавфсизлигини таъминлаш тизимини янада такомиллаштириш чора-тадбирлари тўғрисида”ги 144-сон Фармони қабул қилинган

Мазкур Фармонда ташкилотларда тегишли соҳа мутахассисларини жалб этган ҳолда зилзила ва унинг оқибатларига оид кўргазмали ўқув-услубий воситалар ёрдамида амалий ўқув машғулотларини ташкил этиш бўйича вазирлик ва идоралар, маҳаллий ижро этувчи ҳокимият органларига вазифа юклатилган.

Шундан келиб чиққан ҳолда ўқув машғулотида Агентлик ходимларига фавқулодда вазиятларнинг олдини олиш, хусусан, зилзила ёки ёнғин содир бўлганда тўғри ҳаракат қилиш бўйича зарур билим ва кўникмалар берилди.

Тадбир мобайнида мутахассислар томонидан бу каби фавқулодда вазиятларда муҳофазаланиш, жабрланганларга биринчи ёрдам кўрсатиш, жамоавий ва шахсий ҳимоя воситаларидан фойдаланиш қоидалари ва усулларига бағишланган амалий машғулотлар ўтказилди.

Коррупцияга қарши курашиш агентлиги

Ахборот хизмати