Joriy yilning 3 mart kuni Korrupsiyaga qarshi kurashish agentligi xodimlari uchun zilzila va uning oqibatlari, yong‘in sodir bo‘lganda uni bartaraf etish choralarini ko‘rish yuzasidan Toshkent shahar Favqulodda vaziyatlar boshqarmasi Hayot faoliyati xavfsizligi o‘quv markazi, Yakkasaroy tuman Favqulodda vaziyatlar bo‘linmasi mutaxassislari ishtirokida o‘quv mashg‘uloti o‘tkazildi.

Taʼkidlanganidek, O‘zbekiston Respublikasi Prezidentining 2022 yil 30 maydagi “O‘zbekiston Respublikasining seysmik xavfsizligini taʼminlash tizimini yana-da takomillashtirish chora-tadbirlari to‘g‘risida”gi 144-son Farmoni qabul qilingan

Mazkur Farmonda tashkilotlarda tegishli soha mutaxassislarini jalb etgan holda zilzila va uning oqibatlariga oid ko‘rgazmali o‘quv-uslubiy vositalar yordamida amaliy o‘quv mashg‘ulotlarini tashkil etish bo‘yicha vazirlik va idoralar, mahalliy ijro etuvchi hokimiyat organlariga vazifa yuklatilgan.

Shundan kelib chiqqan holda o‘quv mashg‘ulotida Agentlik xodimlariga favqulodda vaziyatlarning oldini olish, xususan, zilzila yoki yong‘in sodir bo‘lganda to‘g‘ri harakat qilish bo‘yicha zarur bilim va ko‘nikmalar berildi.

Tadbir mobaynida mutaxassislar tomonidan bu kabi favqulodda vaziyatlarda muhofazalanish, jabrlanganlarga birinchi yordam ko‘rsatish, jamoaviy va shaxsiy himoya vositalaridan foydalanish qoidalari va usullariga bag‘ishlangan amaliy mashg‘ulotlar o‘tkazildi.

Korrupsiyaga qarshi kurashish agentligi

Axborot xizmati