Бугун ИИВнинг Жазони ижро этиш депаратменти марказий аппарати ходимлари учун Маънавият ва маърифат дарсида Коррупцияга қарши курашиш агентлиги масъул ходими "Коррупцияга қарши курашиш — тараққиёт кафолати" мавзусидаги маъруза билан иштирок этди.

Маърузачи томонидан коррупцияга қарши курашишнинг халқаро ҳуқуқий асослари, миллий қонунчилик ҳужжатлари, Агентлик томонидан коррупциянинг олдини олиш ва унга қарши курашиш самарадорлигини ошириш мақсадида олиб борилаётган превентив чора-тадбирлар тўғрисида батафсил маълумот берилди.

Хусусан, маъмурий ислоҳотлар жараёнида вазирлик ва идораларда ташкил этилган коррупцияга қарши ички назорат тузилмалари фаолияти, давлат органлари ва ташкилотларининг коррупцияга қарши курашиш самарадорлигини рейтинг баҳолаш ишлари, коррупциявий хавф-хатарларни аниқлаш, баҳолаш ва олдини олиш, манфаатлар тўқнашувини бошқариш бўйича ташкил этилаётган ишлар хусусида сўз юритилди.  

Шунингдек, давлат фуқаролик хизматчиси томонидан хизмат сафарлари, халқаро ва бошқа расмий тадбирлар муносабати билан олиниши мумкин бўлган совға қиймати, шунингдек, уни тасарруф этиш тартиби юзасидан тақдим этилган маълумотлар ҳам иштирокчилар учун муҳим ва фойдали бўлди. 

Мулоқот якунида иштирокчилар томонидан ҳам мавзуга оид фикр-мулоҳазалар билдирилди.
 

Коррупцияга қарши курашиш агентлиги

Ахборот хизмати