БМТнинг Гиёҳванд моддалар ва жиноятчиликка қарши курашиш бошқармасининг (БМТ ГЖБ) Aбу Даби декларацияси дастури доирасида 14-17 март кунлари Таиланднинг Бангкок шаҳрида бўлиб ўтаётган “Молиявий назорат амалга оширувчи идоралар ва коррупцияга қарши курашувчи органлар билан ҳамкорликни кенгайтириш" мавзусидаги семинарда Коррупцияга қарши курашиш агентлиги ва Ҳисоб палатаси масъул ходимлари иборат Ўзбекистон делегацияси иштирок этмоқда.

Маълумот учун: Aбу Даби декларацияси дастури БМТ ГЖБ томонидан БМТнинг Коррупцияга қарши конвенцияси ҳамда Барқарор ривожланиш мақсадларининг ижросини таъминлаш учун 2021 йилда ишга туширилган.

Унда коррупцияга қарши курашишда олий аудит органларининг ролини ошириш ва уларнинг коррупцияга қарши курашиш органлари билан ҳамкорлигини кучайтириш вазифаси ҳам қамраб олинган. 

Семинарнинг вазифаси миллий, минтақавий ва халқаро даражада Молиявий назорат амалга оширувчи идоралари ҳамда коррупцияга қарши курашиш идоралари ўртасидаги мулоқотни кучайтириш, ҳамкорликнинг янги йўналишларини белгилашдан иборат.

Тадбир ушбу соҳадаги энг янги концепция ва сўнгги амалий ишланмаларни очиқ форматда муҳокама қилиш учун муҳим платформа бўлиб хизмат қилади.  

Семинарда, шунингдек, Марказий, Ғарбий Осиё ва Тинч океани минтақасидаги 21 давлат (Индонезия, Хитой, Япония, Малайзия, Тожикистон, Қирғизистон ва бошқалар) вакиллари иштирок этмоқда.

Коррупцияга қарши курашиш агентлиги

Ахборот хизмати