Коррупцияга қарши курашиш соҳасига замонавий ахборот, шу жумладан сунъий интеллект технологияларини жорий этиш, коррупцияга қарши таълим тизимини йўлга қўйиш мақсадида Коррупцияга қарши курашиш агентлиги томонидан хорижий илғор давлатлар тажрибалари ўрганилмоқда. Уларни миллий амалиётга татбиқ этиш бўйича бир қатор ишлар амалга оширилмоқда.

Мазкур ишларнинг узвий давоми сифатида жорий йилнинг 20-22 март кунлари Агентлик делегациясининг Словения давлатига ишчи ташрифи ташкил этилди.

Маълумот учун: Словения Transperancy International ташкилотининг 2022 йил коррупцияни қабул қилиш индексида 41-ўринни эгаллаган.

Словения рақамлаштириш бўйича Европанинг етакчи мамлакатларидан бири. Шунингдек, Словения ҳукумати томонидан 2021-2025 йилларга мўлжалланган сунъий интеллектни ишлаб чиқиш ва жорий этиш бўйича Миллий дастур қабул қилинган.

Ташрифнинг дастлабки куни делегация аъзолари Словениянинг Коррупциянинг олдини олиш комиссияси вакиллари билан учрашишди. Комиссия бош комиссари Роберт Шуми Агентлик вакиллари билан яна бир бор кўришиб турганидан ва ўзаро ҳамкорлик кўлами кенгаётганидан мамнунлигини билдирди. 

Мулоқот давомида давлат дастурлари мониторингини олиб бориш юзасидан тажриба алмашилди, шунингдек, фаолиятга ахборот технологиялари ва сунъий интеллектни жорий этиш, хабар берувчиларни ҳимоя қилиш бўйича Словения тажрибаси бўйича батафсил ахборот берилди.

Бундан ташқари Словения Комиссияси фаолиятида фуқаролик жамияти институтлари билан ҳамкорлик қилиш масалаларида электрон дастур ва маҳсулотлардан фойдаланиш тажрибаси, айни пайтда комиссия томонидан Словениянинг коррупцияга қарши кураш бўйича кўп йиллик стратегик ҳужжатини шакллантириш жараёни, давлат хизматчиларининг даромад ва мол-мулкини декларация қилиш соҳасида қўлланиладиган электрон дастурлар,  давлат хизматчилари ҳамда жамоатчилик хусусан, мактабгача ва мактаб таълим тизимида коррупцияга қарши ўқитиш масалалари бўйича ўқув курсларини ишлаб чиқиш жараёнлари билан танишилди.

Ташрифнинг иккинчи куни 21 март куни Агентлик вакиллари Ёзеф Штефан номидаги илмий-тадқиқот институтида бўлишди.

Маълумот учун: Ёзеф Штефан номидаги институт Европанинг сунъий интеллект соҳасидаги етакчи илмий-тадқиқот марказларидан бўлиб, бу ерда 1100 дан ортиқ олимлар изланиш олиб боради. Институт Microsoft, Bloomberg сингари дунёнинг илғор компанияларига ўз маҳсулотларини етказиб беради.

Словениянинг Ёзеф Штефан институти билан алоқалар 2021 йилнинг октябрь ойида Агентлик директори раҳбарлигидаги Ўзбекистон делегациясининг Словенияга ташрифи давомида ўрнатилган.

Учрашув давомида Ёзеф Штефан институти томонидан ишлаб чиқилган сунъий интеллект маҳсулотлари, электрон дастур ва таъминотлар билан яқиндан танишилди.

Хусусан, институт олимлари томонидан яратилган сунъий интеллект алгоритми ёрдамида давлат бюджети маблағлари сарфланишини мониторинг қилишга мўлжалланган ERAR портали ҳамда оммавий ахборот воситаларини мониторинг қилиш, таҳлил қилиш ҳамда ҳисоботини шакллантиришга қаратилган  EventRegistry платформаси каби электрон дастур ва маҳсулотлар бўйича Институт тажрибаси кўриб чиқилди.

Шунингдек, Институт экспертлари билан мазкур платформаларни Ўзбекистон шароитига мослаштириш ва бошқа бир  қатор масалаларда музокаралар олиб борилди.

Ташрифнинг сўнгги кунида Агентлик вакиллари Давлат бошқаруви вазирлиги раҳбарияти билан учрашди.

Словения Республикаси Давлат бошқаруви вазирлигининг вазифа ва функциялари, давлат харидлари жараёнларини рақамлаштириш билан боғлиқ дастурий маҳсулотлари, унинг босқичлари ҳамда талаблари ҳақида ахборот берилди. 

Словениянинг электрон ҳукумат жорий этилиши, очиқ маълумотларнинг эълон қилиниши ҳамда Ҳукуматда ахборот технологияларининг жорий этилиши бўйича Словения тажрибаси билан танишиш, шу жумладан сунъий интеллектдан фойдаланиш масалаларидаги амалиёти билан танишилди.

Учрашувлар якунида  Агентлик фаолиятини рақамлаштириш ва сунъий интеллектни жорий этиш бўйича ҳамкорликнинг аниқ механизмлари белгилаб олинди. 

Коррупцияга қарши курашиш агентлиги
Ахборот хизмати