Korrupsiyaga qarshi kurashish sohasiga zamonaviy axborot, shu jumladan sunʼiy intellekt texnologiyalarini joriy etish, korrupsiyaga qarshi taʼlim tizimini yo‘lga qo‘yish maqsadida Korrupsiyaga qarshi kurashish agentligi tomonidan xorijiy ilg‘or davlatlar tajribalari o‘rganilmoqda. Ularni milliy amaliyotga tatbiq etish bo‘yicha bir qator ishlar amalga oshirilmoqda.

Mazkur ishlarning uzviy davomi sifatida joriy yilning 20-22 mart kunlari Agentlik delegatsiyasining Sloveniya davlatiga ishchi tashrifi tashkil etildi.

Maʼlumot uchun: Sloveniya Transperancy International tashkilotining 2022 yil korrupsiyani qabul qilish indeksida 41-o‘rinni egallagan.

Sloveniya raqamlashtirish bo‘yicha Yevropaning yetakchi mamlakatlaridan biri. Shuningdek, Sloveniya hukumati tomonidan 2021-2025 yillarga mo‘ljallangan sunʼiy intellektni ishlab chiqish va joriy etish bo‘yicha Milliy dastur qabul qilingan.

Tashrifning dastlabki kuni delegatsiya aʼzolari Sloveniyaning Korrupsiyaning oldini olish komissiyasi vakillari bilan uchrashishdi. Komissiya bosh komissari Robert Shumi Agentlik vakillari bilan yana bir bor ko‘rishib turganidan va o‘zaro hamkorlik ko‘lami kengayotganidan mamnunligini bildirdi. 

Muloqot davomida davlat dasturlari monitoringini olib borish yuzasidan tajriba almashildi, shuningdek, faoliyatga axborot texnologiyalari va sunʼiy intellektni joriy etish, xabar beruvchilarni himoya qilish bo‘yicha Sloveniya tajribasi bo‘yicha batafsil axborot berildi.

Bundan tashqari Sloveniya Komissiyasi faoliyatida fuqarolik jamiyati institutlari bilan hamkorlik qilish masalalarida elektron dastur va mahsulotlardan foydalanish tajribasi, ayni paytda komissiya tomonidan Sloveniyaning korrupsiyaga qarshi kurash bo‘yicha ko‘p yillik strategik hujjatini shakllantirish jarayoni, davlat xizmatchilarining daromad va mol-mulkini deklaratsiya qilish sohasida qo‘llaniladigan elektron dasturlar,  davlat xizmatchilari hamda jamoatchilik xususan, maktabgacha va maktab taʼlim tizimida korrupsiyaga qarshi o‘qitish masalalari bo‘yicha o‘quv kurslarini ishlab chiqish jarayonlari bilan tanishildi.

Tashrifning ikkinchi kuni 21-mart kuni Agentlik vakillari Yozef Shtefan nomidagi ilmiy-tadqiqot institutida bo‘lishdi.

Maʼlumot uchun: Yozef Shtefan nomidagi institut Yevropaning sunʼiy intellekt sohasidagi yetakchi ilmiy-tadqiqot markazlaridan bo‘lib, bu yerda 1100 dan ortiq olimlar izlanish olib boradi. Institut Microsoft, Bloomberg singari dunyoning ilg‘or kompaniyalariga o‘z mahsulotlarini yetkazib beradi.

Sloveniyaning Yozef Shtefan instituti bilan aloqalar 2021 yilning oktyabr oyida Agentlik direktori rahbarligidagi O‘zbekiston delegatsiyasining Sloveniyaga tashrifi davomida o‘rnatilgan.

Uchrashuv davomida Yozef Shtefan instituti tomonidan ishlab chiqilgan sunʼiy intellekt mahsulotlari, elektron dastur va taʼminotlar bilan yaqindan tanishildi.

Xususan, institut olimlari tomonidan yaratilgan sunʼiy intellekt algoritmi yordamida davlat byudjeti mablag‘lari sarflanishini monitoring qilishga mo‘ljallangan ERAR portali hamda ommaviy axborot vositalarini monitoring qilish, tahlil qilish hamda hisobotini shakllantirishga qaratilgan  EventRegistry platformasi kabi elektron dastur va mahsulotlar bo‘yicha Institut tajribasi ko‘rib chiqildi.

Shuningdek, Institut ekspertlari bilan mazkur platformalarni O‘zbekiston sharoitiga moslashtirish va boshqa bir qator masalalarda muzokaralar olib borildi.

Tashrifning so‘nggi kunida Agentlik vakillari Davlat boshqaruvi vazirligi rahbariyati bilan uchrashdi.

Sloveniya Respublikasi Davlat boshqaruvi vazirligining vazifa va funksiyalari, davlat xaridlari jarayonlarini raqamlashtirish bilan bog‘liq dasturiy mahsulotlari, uning bosqichlari hamda talablari haqida axborot berildi. 

Sloveniyaning elektron hukumat joriy etilishi, ochiq maʼlumotlarning eʼlon qilinishi hamda Hukumatda axborot texnologiyalarining joriy etilishi bo‘yicha Sloveniya tajribasi bilan tanishish, shu jumladan sunʼiy intellektdan foydalanish masalalaridagi amaliyoti bilan tanishildi.

Uchrashuvlar yakunida  Agentlik faoliyatini raqamlashtirish va sunʼiy intellektni joriy etish bo‘yicha hamkorlikning aniq mexanizmlari belgilab olindi. 

Korrupsiyaga qarshi kurashish agentligi
Axborot xizmati