Агентлик томонидан ташкил этилган ўқув-семинарида давлат органлари ва ташкилотларининг 160 дан ортиқ ходимлари иштирок этди. Семинар давомида давлат органлари ва ташкилотларининг коррупцияга қарши ички назорат тузилмалари ходимларига давлат органлари ва ташкилотлари, шу жумладан маҳаллий давлат ҳокимияти органларида коррупцияга қарши курашиш ишларининг самарадорлигини рейтинг баҳолаш натижалари ҳамда ташкилотлар томонидан e-anticor.uz электрон платформасига маълумотларни киритишда йўл қўйилган камчиликлар тўғрисида батафсил маълумотлар берилди.

Семинар дастурига кўра коррупцияга қарши курашиш ишларининг самарадорлигини рейтинг баҳолаш натижалари бўйича фаолияти “яхши” деб топилган Ўзбекистон Техник жиҳатдан тартибга солиш агентлиги ва “Ипотека-банк” акциядорлик тижорат ипотека банкларининг мутахассислари ушбу ташкилотларнинг коррупцияга қарши курашишдаги ижобий тажрибалари ҳақида маърузалар билан иштирок этдилар.

Шунингдек, семинарда “Минтақавий мулоқот” халқаро ноҳукумат ташкилоти (Словения) эксперти Квентин Рид “Коррупция хавф-хатарларини баҳолаш тушунчаси ва қўлланилиши” мавзусидаги тақдимот билан иштирок этди.

Бундан ташқари, Агентлик мутахассиcлари томонидан давлат органлари ва ташкилотлари, уларнинг ҳудудий ва таркибий бўлинмаларида коррупция хавф-хатарларини баҳолаш натижалари ҳақида маълумот берилиб, ташкилотлардаги коррупцион хавф-хатарларни баҳолаш, улар ҳақидаги маълумотларни e-anticor.uz электрон платформасига киритишда йўл қўйилган камчиликлар муҳокама қилинди.

Семинар давомида иштирокчиларни қизиқтирган барча саволларга Агентлик мутахассислари ва халқаро эксперт томонидан батафсил маълумотлар берилди.

Коррупцияга қарши курашиш агентлиги

Ахборот хизмати