Жорий йилнинг 29-апрель куни Коррупцияга қарши курашиш агентлиги директори Акмал Бурханов референдумнинг халқаро кузатувчилари сифатида ташриф буюрган Япониянинг Нагоя иқтисодиёт университети президенти Харуо Сабури ва университет профессори Кацуя Ичихашиларни қабул қилди.

Учрашувда конституциявий ислоҳотлар, референдумга тайёргарлик кўриш ва уни ўтказиш бўйича кўрилаётган чора-тадбирлар, шунингдек, Нагоя иқтисодиёт университети ҳамда Агентлик ўртасида ҳамкорлик истиқболлари муҳокама қилинди.

Хусусан, Нагоя иқтисодиёт университети президенти Харуо Сабури референдумга тайёргарлик кўриш жараёнларини юқори баҳолади ва референдум тадбирларида фаол иштирок этишга тайёрлигини билдирди.

Бундан ташқари, учрашувда Агентлик, Нагоя иқтисодиёт университети ва JICA (Япония халқаро ҳамкорлик агентлиги) ўртасида ҳамкорлик лойиҳасини ишга тушириш масалалари муҳокама этилди. Университет томонидан лойиҳа дастурини ишлаб чиқишда, халқаро экспертларни жалб қилишда, тренинг ва семинарларни ташкил этишда экспертлик ёрдамини кўрсатиш каби ҳамкорлик йўналишлари муҳокама этилди.

Учрашув сўнггида томонлар коррупциянинг олдини олиш ва унга қарши курашишда яқин ҳамкорликни олиб бориш, биргаликда қўшма лойиҳаларни амалга ошириш бўйича келишувга эришдилар.

Коррупцияга қарши курашиш агентлиги

Ахборот хизмати