Жорий йилнинг 12 май куни Коррупцияга қарши курашиш агентлиги ҳамда Жамоат хавфсизлиги университети ўртасида ҳамкорлик меморандумини имзолаш маросими бўлиб ўтди.

Меморандумнинг асосий мақсади коррупциянинг олдини олиш ҳамда унга қарши курашиш соҳасида илмий ва амалий тадқиқотлар олиб бориш, коррупция ҳолатининг тизимли таҳлилини ҳамкорликда амалга ошириш, шунингдек, бўлажак кадрларни коррупцияга қарши муросасиз муносабатда тарбиялаш, коррупцияга оид хавф-хатарлар юқори бўлган соҳалар ҳамда коррупцияга оид ҳуқуқбузарликлар содир этилишининг сабаб ва шарт-шароитларини биргаликда аниқлашдан иборат.

Меморандум доирасида томонлар қуйидаги вазифаларни ҳамкорликда амалга оширишлари белгиланган:

– коррупцияга қарши курашиш соҳасида таълим дастурларини ишлаб чиқиш ва такомиллаштириш;

– коррупция ҳолати, тенденциялари ва коррупцияга қарши курашишнинг самарадорлигини оширишга оид социологик, илмий ва бошқа тадқиқотларни ташкил этиш;

– коррупцияга қарши курашиш давлат дастурлари ва бошқа дастурлар лойиҳаларини тайёрлаш ҳамда ижро этилишини таъминлаш;

– коррупцияга қарши курашиш бўйича тегишли соҳа ёки тармоқ кесимида аҳолининг ҳуқуқий онги ва ҳуқуқий маданиятини юксалтириш, ушбу иллатга нисбатан муросасиз муносабатни шакллантиришга қаратилган тарғибот тадбирларини ва амалга ошириш;

- олиб борилган илмий-фундаментал тадқиқотлар натижалари ва янги ютуқларни амалиётга татбиқ этиш бўйича Тарафларнинг қўшма лойиҳаларини амалга ошириш.

Тадбир давомида меморандумдаги шу ва бошқа вазифаларнинг ижросини тўлиқ таъминлаш мақсадида чора-тадбирлар режаси имзоланди.

Коррупцияга қарши курашиш агентлиги

Ахборот хизмати