Joriy yilning 12-may kuni Korrupsiyaga qarshi kurashish agentligi hamda Jamoat xavfsizligi universiteti o‘rtasida hamkorlik memorandumini imzolash marosimi bo‘lib o‘tdi.

Memorandumning asosiy maqsadi korrupsiyaning oldini olish hamda unga qarshi kurashish sohasida ilmiy va amaliy tadqiqotlar olib borish, korrupsiya holatining tizimli tahlilini hamkorlikda amalga oshirish, shuningdek, bo‘lajak kadrlarni korrupsiyaga qarshi murosasiz munosabatda tarbiyalash, korrupsiyaga oid xavf-xatarlar yuqori bo‘lgan sohalar hamda korrupsiyaga oid huquqbuzarliklar sodir etilishining sabab va shart-sharoitlarini birgalikda aniqlashdan iborat.

Memorandum doirasida tomonlar quyidagi vazifalarni hamkorlikda amalga oshirishlari belgilangan:

– korrupsiyaga qarshi kurashish sohasida taʼlim dasturlarini ishlab chiqish va takomillashtirish;

– korrupsiya holati, tendensiyalari va korrupsiyaga qarshi kurashishning samaradorligini oshirishga oid sotsiologik, ilmiy va boshqa tadqiqotlarni tashkil etish;

– korrupsiyaga qarshi kurashish davlat dasturlari va boshqa dasturlar loyihalarini tayyorlash hamda ijro etilishini taʼminlash;

– korrupsiyaga qarshi kurashish bo‘yicha tegishli soha yoki tarmoq kesimida aholining huquqiy ongi va huquqiy madaniyatini yuksaltirish, ushbu illatga nisbatan murosasiz munosabatni shakllantirishga qaratilgan targ‘ibot tadbirlarini va amalga oshirish;

- olib borilgan ilmiy-fundamental tadqiqotlar natijalari va yangi yutuqlarni amaliyotga tatbiq etish bo‘yicha Taraflarning qo‘shma loyihalarini amalga oshirish.

Tadbir davomida memorandumdagi shu va boshqa vazifalarning ijrosini to‘liq taʼminlash maqsadida chora-tadbirlar rejasi imzolandi.

Korrupsiyaga qarshi kurashish agentligi

Axborot xizmati