Ўзбекистон Республикаси Президентининг 2020 йил 29 июндаги 6013-сон Фармонига мувофиқ, Коррупцияга қарши курашиш агентлиги томонидан Қишлоқ хўжалиги вазирлиги ҳузуридаги Қишлоқ хўжалигида хизматлар кўрсатиш агентлигида (кейинги ўринларда - Агентлик) коррупцияга қарши ички назорат тизими йўлга қўйилганлиги ҳолати ўрганилди.

Ўрганиш жараёнида қуйидагилар маълум бўлди:

Ўзбекистон Республикаси Президентининг 2023 йил 25 январдаги “Республика ижро этувчи ҳокимият органлари фаолиятини самарали йўлга қўйишга доир биринчи навбатдаги ташкилий чора-тадбирлар тўғрисида”ги 14-сон Фармони ижроси юзасидан Агентликнинг 2023 йил 31 январдаги тегишли буйруғи қабул қилиниб, марказий аппарат (24 штат бирлигидан иборат) ҳамда ҳудудий бошқармаларнинг (265 штат бирлигидан иборат) вақтинчалик тузилмалари тасдиқланган.

Унга кўра, коррупцияга қарши курашиш тузилмаси штат бирлиги қисқартирилган ва бу бугунги кунда Агентлик фаолиятида коррупциянинг олдини олишга доир механизмларни амалиётга татбиқ этиш билан боғлиқ тизимли муаммоларга сабаб бўлмоқда.

Маълумот учун: Ўзбекистон Республикаси Президентининг 2021 йил 15 декабрдаги “Мева-сабзавотчилик соҳасини давлат томонидан қўллаб-қувватлаш, тармоқда кластер ва кооперация тизимини янада ривожлантириш чора-тадбирлари тўғрисида”ги 52-сон қарори билан Агентликнинг тасдиқланган тузилмасига кўра, марказий аппаратда 1 та штат бирлигидан иборат Комплаенс назорат хизмати фаолият юритиб келган.

Жумладан, коррупцияга қарши ички назорат тузилмасини ташкил этиш бўйича институционал масалаларни ҳал этиш чоралари якунига етказилмаган. Натижада Агентлик томонидан қабул қилинган коррупцияга қарши курашишга оид ҳужжатларнинг (10 та идоравий ҳужжатлар) масъул ижрочилари ноаниқлигича қолган.

Ўрганиш натижаларига кўра, коррупцияга қарши курашиш тизимини жорий этиш бўйича бир қатор ҳужжатлар ишлаб чиқилган бўлишига қарамай, уларни амалга ошириш механизми йўлга қўйилмаган.

Хусусан:

- коррупцияга қарши курашиш тизимининг ҳолати тўғрисида ҳисоботлар шакллантирилмаган;

- коррупцияга қарши курашиш тамойиллар ва талабларига риоя этилиш ҳолатининг самарадорлигини мониторинг ва назорат қилиш ишлари йўлга қўйилмаган;

- коррупцияга қарши умумий ва махсус ўқитиш бўйича дастурлар ишлаб чиқилмаган;

- ходимларнинг амалдаги меҳнат шартномаларига коррупцияга қарши шартларни бажариш зарурлиги ҳақида бандлар киритиш масаласи кўриб чиқилмаган;

- ташкилотда коррупциявий хавф-хатарларни баҳолашдан ўтказиш чоралари кўрилмаган. Ўз навбатида, коррупциявий хавф-хатарлар харитаси, коррупция хавф-хатарига энг кўп мойил бўлган лавозимлар рўйхати ҳамда хавф-хатарларни минималлаштириш бўйича дастур тасдиқланмаган;

- манфаатлар тўқнашувини декларация қилиш бўйича Агентликда алоҳида ҳужжат қабул қилинган бўлсада, ходимларнинг манфаатлар тўқнашуви ҳақидаги йиллик декларацияларни таҳлил қилиш ва манфаатлар тўқнашуви мавжудлиги бўйича реестрни юритиш йўлга қўйилмаган;

- коррупциявий хатти-ҳаракатлар тўғрисида келиб тушган хабарларни қабул қилиш ва кўриб чиқиш Регламентига асосан келиб тушган мурожаатларнинг алоҳида реестри юритилмаган.

Бундан ташқари, Ўзбекистон Республикаси Президентининг 2022 йил 12 январдаги “Коррупцияга қарши курашиш ишларининг самарадорлигини рейтинг баҳолаш тизимини жорий этиш чора-тадбирлари тўғрисида”ги ПҚ-81-сон Қарорига кўра, давлат ташкилотлари томонидан ҳар чоракда чораклик маълумотлар электрон платформа орқали Рейтинг баҳолаш йўналишлари ва индикатор кўрсаткичлари жадвалини тўлдириш йўли билан киритиб борилиши белгиланган бўлсада, мазкур қарор ижроси Агентлик томонидан таъминланмаган.

Юқорида қайд этилган қонун бузилиши ҳолатларини, жумладан, коррупцияни келтириб чиқарувчи сабаб ва шарт-шароитларни бартараф этиш юзасидан Қишлоқ хўжалигида хизматлар кўрсатиш агентлигига тақдимнома киритилди.

Коррупцияга қарши курашиш агентлиги

Ахборот хизмати