O‘zbekiston Respublikasi Prezidentining 2020-yil 20-iyundagi 6013-son Farmoniga muvofiq, Korrupsiyaga qarshi kurashish agentligi tomonidan Qishloq xo‘jaligi vazirligi huzuridagi Qishloq xo‘jaligida xizmatlar ko‘rsatish agentligida (keyingi o‘rinlarda - Agentlik) korrupsiyaga qarshi ichki nazorat tizimi yo‘lga qo‘yilganligi holati o‘rganildi.

O‘rganish jarayonida quyidagilar maʼlum bo‘ldi:

O‘zbekiston Respublikasi Prezidentining 2023-yil 25-yanvardagi “Respublika ijro etuvchi hokimiyat organlari faoliyatini samarali yo‘lga qo‘yishga doir birinchi navbatdagi tashkiliy chora-tadbirlar to‘g‘risida”gi 14-son Farmoni ijrosi yuzasidan Agentlikning 2023-yil 31-yanvardagi tegishli buyrug‘i qabul qilinib, markaziy apparat (24 shtat birligidan iborat) hamda hududiy boshqarmalarning (265 shtat birligidan iborat) vaqtinchalik tuzilmalari tasdiqlangan.

Unga ko‘ra, korrupsiyaga qarshi kurashish tuzilmasi shtat birligi qisqartirilgan va bu bugungi kunda Agentlik faoliyatida korrupsiyaning oldini olishga doir mexanizmlarni amaliyotga tatbiq etish bilan bog‘liq tizimli muammolarga sabab bo‘lmoqda.

Maʼlumot uchun: O‘zbekiston Respublikasi Prezidentining 2021-yil 15-dekabrdagi “Meva-sabzavotchilik sohasini davlat tomonidan qo‘llab-quvvatlash, tarmoqda klaster va kooperatsiya tizimini yanada rivojlantirish chora-tadbirlari to‘g‘risida”gi 52-son qarori bilan Agentlikning tasdiqlangan tuzilmasiga ko‘ra, markaziy apparatda 1 ta shtat birligidan iborat Komplayens nazorat xizmati faoliyat yuritib kelgan.

Jumladan, korrupsiyaga qarshi ichki nazorat tuzilmasini tashkil etish bo‘yicha institutsional masalalarni hal etish choralari yakuniga yetkazilmagan.Natijada Agentlik tomonidan qabul qilingan korrupsiyaga qarshi kurashishga oid hujjatlarning (10 ta idoraviy hujjatlar) masʼul ijrochilari noaniqligicha qolgan.

O‘rganish natijalariga ko‘ra, korrupsiyaga qarshi kurashish tizimini joriy etish bo‘yicha bir qator hujjatlar ishlab chiqilgan bo‘lishiga qaramay, ularni amalga oshirish mexanizmi yo‘lga qo‘yilmagan.

Xususan:

- korrupsiyaga qarshi kurashish tizimining holati to‘g‘risida hisobotlar shakllantirilmagan;

- korrupsiyaga qarshi kurashish tamoyillar va talablariga rioya etilish holatining samaradorligini monitoring va nazorat qilish ishlari yo‘lga qo‘yilmagan;

- korrupsiyaga qarshi umumiy va maxsus o‘qitish bo‘yicha dasturlar ishlab chiqilmagan;

- xodimlarning amaldagi mehnat shartnomalariga korrupsiyaga qarshi shartlarni bajarish zarurligi haqida bandlar kiritish masalasi ko‘rib chiqilmagan;

- tashkilotda korrupsiyaviy xavf-xatarlarni baholashdan o‘tkazish choralari ko‘rilmagan. O‘z navbatida, korrupsiyaviy xavf-xatarlar xaritasi, korrupsiya xavf-xatariga eng ko‘p moyil bo‘lgan lavozimlar ro‘yxati hamda xavf-xatarlarni minimallashtirish bo‘yicha dastur tasdiqlanmagan;

- manfaatlar to‘qnashuvini deklaratsiya qilish bo‘yicha Agentlikda alohida hujjat qabul qilingan bo‘lsada, xodimlarning manfaatlar to‘qnashuvi haqidagi yillik deklaratsiyalarni tahlil qilish va manfaatlar to‘qnashuvi mavjudligi bo‘yicha reyestrni yuritish yo‘lga qo‘yilmagan;

- korrupsiyaviy xatti-harakatlar to‘g‘risida kelib tushgan xabarlarni qabul qilish va ko‘rib chiqish Reglamentiga asosan kelib tushgan murojaatlarning alohida reyestri yuritilmagan.

Bundan tashqari, O‘zbekiston Respublikasi Prezidentining 2022-yil 12- yanvardagi “Korrupsiyaga qarshi kurashish ishlarining samaradorligini reyting baholash tizimini joriy etish chora-tadbirlari to‘g‘risida”gi PQ-81-son Qaroriga ko‘ra, davlat tashkilotlari tomonidan har chorakda choraklik maʼlumotlar elektron platforma orqali Reyting baholash yo‘nalishlari va indikator ko‘rsatkichlari jadvalini to‘ldirish yo‘li bilan kiritib borilishi belgilangan bo‘lsa-da, mazkur qaror ijrosi Agentlik tomonidan taʼminlanmagan.

Yuqorida qayd etilgan qonun buzilishi holatlarini, jumladan, korrupsiyani keltirib chiqaruvchi sabab va shart-sharoitlarni bartaraf etish yuzasidan Qishloq xo‘jaligida xizmatlar ko‘rsatish agentligiga taqdimnoma kiritildi.

Korrupsiyaga qarshi kurashish agentligi

Axborot xizmati