Коррупцияга қарши курашиш агентлиги томонидан daryo.uz сайтида эълон қилинган “Хоразмдаги ихтисослашган мактаб қарийб 100 млн сўмлик тендерни ноқонуний ўтказди” сарлавҳали хабарда қайд этилган ҳолатлар ўрганилди.

Аниқланишича, Президент таълим муассасалари агентлиги тизимидаги Қўшкўпир туман ихтисослаштирилган мактаби буюртмачилигида “etender.uzex.uz” махсус ахборот порталига 2023 йил 12 май куни “Маънавият тарғибот стендлари сотиб олиш ва ўрнатиш” юзасидан 94,8 млн сўмлик танлаш ўтказилиши ҳақида эълон жойлаштирилган.

Муассаса харид комиссиясининг 2023 йил 19 май кунидаги ғолибни аниқлаш баённомаси билан «Р.И» МЧЖ танлаш ғолиби, «М.Й.Ф» МЧЖ эса захирадаги ғолиб деб топилган.

Ўрганиш давомида танлашда ғолибликни қўлга киритган ҳамда захирадаги ғолиб деб топилган жамиятларнинг таъсисчи ва раҳбарлари ўзаро аффилланган шахслар бўлса-да,  улар харид комиссияси томонидан харид қилиш жараёнидан четлатилмаганлиги ва натижада “Давлат харидлари тўғрисида”ги Қонуннинг 42-моддаси талаблари қўпол равишда бузилганлиги аниқланди.

Шу ва бошқа қонунбузилиши ҳолатлари юзасидан 2023 йил 22 май куни Ўзбекистон Республикаси Президент таълим муассасалари агентлиги ҳамда буюртмачига ўтказилган танлаш бўйича харид комиссияси баённомасини бекор қилиш юзасидан тақдимнома киритилди.

Бундан ташқари, қонунбузилиши ҳолатларига ҳуқуқий баҳо бериш учун тўпланган ҳужжатлар Давлат молиявий назорат инспекциясига юборилди.

Коррупцияга қарши курашиш агентлиги

Ахборот хизмати