Иқтисодий ҳамкорлик ва тараққиёт ташкилотининг таклифига асосан, Коррупцияга қарши курашиш агентлиги директори ўринбосари бошчилигидаги Ўзбекистон делегацияси Коррупцияга қарши курашиш ва ҳалоллик бўйича глобал форумда иштирок этиш учун Францияда бўлиб турибди.

Маълумот учун: Коррупцига қарши курашиш ва ҳалоллик бўйича Глобал Форум – 2013 йилдан буён ҳар йили ташкил этилаётган тадбир бўлиб, унга коррупцияга қарши курашувчи давлат идоралари, жамоатчилик вакиллари, хусусий сектор ва нодавлат ташкилотлар таклиф этилади. Тадбирда 110 дан ортиқ давлатдан 1500 дан зиёд иштирокчилар иштирок этиб келади.

Форум коррупцияга қарши курашиш соҳасида глобал тенденциялар, мавжуд муаммо ва тахдидлар, уларни бартараф этиш, шунингдек халқаро ва миллий стандартлар жорий этилиши масалаларини муҳокама қилиш мақсадида ташкил этилди.

Ўзбекистон делегацияси тадбир доирасида ИҲТТ Аксилкоррупция тармоғи раҳбарияти билан учрашиб, Истанбул ҳаракатлар режаси доирасида Ўзбекистоннинг 5 раунд мониторинги билан боғлиқ масалаларни муҳокама қилишди.

Маълумот учун: Истанбул ҳаракатлар режаси Марказий Осиё ва Шарқий Европа мамлакатлари учун ИҲТТ Аксилкоррупция тармоғининг субрегионал дастури бўлиб, унинг доирасида аъзо давлатлар томонидан БМТнинг коррупцияга қарши конвенцияси ва соҳага оид ИҲТТ стандартлари имплементация қилинганлик даражаси ўрганилади.

Шунингдек, ташриф доирасида Ўзбекистон делегацияси Козоғистон коррупцияга қарши курашиш агентлиги ва Арманистон Адлия вазирлиги вакиллари билан ИХТТ доирасидаги мониторинг, Франция коррупцияга қарши курашиш агентлиги вакиллари билан комплаенс-назорат тизимини жорий этишда тажриба алмашиш масалаларида муҳокамалар ўтказдилар.

Ўз ўрнида, Агентлик вакиллари ва Франция Миллий юридик мактаби раҳбарияти ўртасида бўлиб ўтган учрашувда соҳа бўйича махсус курсларни ишлаб чиқиш ва Ўзбекистонда соҳадаги ваколатли органлар ходимлари малакасини кўтаришда ҳамкорликни йўлга қўйиш юзасидан келишувга эришилди.

Коррупцияга қарши курашиш агентлиги

Ахборот хизмати