Iqtisodiy hamkorlik va taraqqiyot tashkilotining taklifiga asosan, Korrupsiyaga qarshi kurashish agentligi direktori o‘rinbosari boshchiligidagi O‘zbekiston delegatsiyasi Korrupsiyaga qarshi kurashish va halollik bo‘yicha global forumda ishtirok etish uchun Fransiyada bo‘lib turibdi.

Maʼlumot uchun: Korrupsiga qarshi kurashish va halollik bo‘yicha Global Forum – 2013 yildan buyon har yili tashkil etilayotgan tadbir bo‘lib, unga korrupsiyaga qarshi kurashuvchi davlat idoralari, jamoatchilik vakillari, xususiy sektor va nodavlat tashkilotlar taklif etiladi. Tadbirda 110 dan ortiq davlatdan 1500 dan ziyod ishtirokchilar ishtirok etib keladi.

Forum korrupsiyaga qarshi kurashish sohasida global tendensiyalar, mavjud muammo va taxdidlar, ularni bartaraf etish, shuningdek xalqaro va milliy standartlar joriy etilishi masalalarini muhokama qilish maqsadida tashkil etildi.

O‘zbekiston delegatsiyasi tadbir doirasida IHTT Aksilkorrupsiya tarmog‘i rahbariyati bilan uchrashib, Istanbul harakatlar rejasi doirasida O‘zbekistonning 5 raund monitoringi bilan bog‘liq masalalarni muhokama qilishdi.

Maʼlumot uchun: Istanbul harakatlar rejasi Markaziy Osiyo va Sharqiy Yevropa mamlakatlari uchun IHTT Aksilkorrupsiya tarmog‘ining subregional dasturi bo‘lib, uning doirasida aʼzo davlatlar tomonidan BMTning korrupsiyaga qarshi konvensiyasi va sohaga oid IHTT standartlari implementatsiya qilinganlik darajasi o‘rganiladi.

Shuningdek, tashrif doirasida O‘zbekiston delegatsiyasi Kozog‘iston korrupsiyaga qarshi kurashish agentligi va Armaniston Adliya vazirligi vakillari bilan IXTT doirasidagi monitoring, Fransiya korrupsiyaga qarshi kurashish agentligi vakillari bilan komplayens-nazorat tizimini joriy etishda tajriba almashish masalalarida muhokamalar o‘tkazdilar.

O‘z o‘rnida, Agentlik vakillari va Fransiya Milliy yuridik maktabi rahbariyati o‘rtasida bo‘lib o‘tgan uchrashuvda soha bo‘yicha maxsus kurslarni ishlab chiqish va O‘zbekistonda sohadagi vakolatli organlar xodimlari malakasini ko‘tarishda hamkorlikni yo‘lga qo‘yish yuzasidan kelishuvga erishildi.

Korrupsiyaga qarshi kurashish agentligi

Axborot xizmati