Жорий йилнинг 22-26 май кунлари Коррупцияга қарши курашиш агентлиги, Бош Прокуратура ва Ички ишлар вазирлигининг киберхавфсизлик маркази вакиллари Будапешт ҳуқуқни муҳофаза қилиш халқаро академиясининг кибержиноятларни текшириш ва криптоактивлардан фойдаланиш бўйича ўқув семинарида иштирок этди.

Ўқув семинарида Словакия, Қозоғистон ва Грузиянинг ваколатли органлари вакиллари ҳам иштирок этди.

Маълумот учун: Дунёда компьютер технологиялари ва криптоактивлар ёрдамида содир этилган жиноятлар сони сезиларли даражада ошиб бормоқда. Шу муносабат билан ҳуқуқни муҳофаза қилувчи органларнинг ушбу турдаги жиноятларга қарши курашиш салоҳиятини кучайтириш мақсадида мазкур ўқув семинари ташкил этилди.

Семинарда интернет маконида фойдаланиладиган шахсий маълумотлар хавфсизлигини таъминловчи замонавий дастурий таъминотлар намойиш этилди. Шунингдек, шахсий маълумотлар, гиёҳванд моддалар ва қуролларнинг ноқонуний савдоси билан боғлиқ виртуал жиноятларни аниқлашнинг муваффақиятли амалиётлари мисол тариқасида келтирилди.

Таъкидланганидек, кибертехнологиялар жиноят содир этиш усулларини, жумладан, коррупцияни яшириш имконини беради, чунки крипто-активлар жиноий фаолиятни молиялаштиришда тобора кўпроқ фойдаланилмоқда.

Ўқув семинари давомида Ўзбекистон Республикаси вакиллари хорижий ҳамкорларни киберхавфсизлик ва жиноятларни очишда замонавий технологиялардан фойдаланиш соҳасида амалга оширилаётган ишлар билан таништириб ўтди.

Коррупцияга қарши курашиш агентлиги

Ахборот хизмати