Joriy yilning 22-26 may kunlari Korrupsiyaga qarshi kurashish agentligi, Bosh Prokuratura va Ichki ishlar vazirligining kiberxavfsizlik markazi vakillari Budapesht huquqni muhofaza qilish xalqaro akademiyasining kiberjinoyatlarni tekshirish va kriptoaktivlardan foydalanish bo‘yicha o‘quv seminarida ishtirok etdi.

O‘quv seminarida Slovakiya, Qozog‘iston va Gruziyaning vakolatli organlari vakillari ham ishtirok etdi.

Maʼlumot uchun: Dunyoda kompyuter texnologiyalari va kriptoaktivlar yordamida sodir etilgan jinoyatlar soni sezilarli darajada oshib bormoqda. Shu munosabat bilan huquqni muhofaza qiluvchi organlarning ushbu turdagi jinoyatlarga qarshi kurashish salohiyatini kuchaytirish maqsadida mazkur o‘quv seminari tashkil etildi.

Seminarda internet makonida foydalaniladigan shaxsiy maʼlumotlar xavfsizligini taʼminlovchi zamonaviy dasturiy taʼminotlar namoyish etildi. Shuningdek, shaxsiy maʼlumotlar, giyohvand moddalar va qurollarning noqonuniy savdosi bilan bog‘liq virtual jinoyatlarni aniqlashning muvaffaqiyatli amaliyotlari misol tariqasida keltirildi.

Taʼkidlanganidek, kibertexnologiyalar jinoyat sodir etish usullarini, jumladan, korrupsiyani yashirish imkonini beradi, chunki kripto-aktivlar jinoiy faoliyatni moliyalashtirishda tobora ko‘proq foydalanilmoqda.

O‘quv seminari davomida O‘zbekiston Respublikasi vakillari xorijiy hamkorlarni kiberxavfsizlik va jinoyatlarni ochishda zamonaviy texnologiyalardan foydalanish sohasida amalga oshirilayotgan ishlar bilan tanishtirib o‘tdi.

Korrupsiyaga qarshi kurashish agentligi

Axborot xizmati