Жорий йилнинг 31 май куни Коррупцияга қарши курашиш агентлиги ҳамда АҚШ Давлат департаментининг Халқаро наркотик моддалар ва ҳуқуқни муҳофаза қилиш ишлари бўйича бюроси (INL) ўртасида ўзаро ҳамкорликни янада ривожлантириш масалаларига бағишланган учрашув бўлиб ўтди.

Учрашувда Агентлик раҳбарияти, INL катта маслаҳатчиси Жеймс Каллахан, Бюронинг Ўзбекистондаги ваколатхонаси раҳбари Жек Андерсон ва ҳар икки ташкилот масъул ходимлари иштирок этди.

Мулоқот аввалида Агентлик директори А.Бурханов Ўзбекистонда коррупцияга қарши курашиш сиёсатидаги тенденциялар хусусида сўз юритиб, соҳадаги ислоҳотларни самарали амалга оширишда АҚШ томони яқиндан кўмак кўрсатиб келаётганлигини мамнуният билан эътироф этди.

Учрашувда ҳамкорликнинг янги йўналишлари, хусусан,  Ўзбекистонда коррупцияга қарши курашиш бўйича стратегия ҳамда қонун ҳужжатлари лойиҳаларини ишлаб чиқишда экспертлик кўмагини кўрсатиш, Коррупцияга қарши курашиш Минтақавий маркази (Хаб) фаолиятини йўлга қўйиш каби масалаларда ҳамкорлик масалалари муҳокама қилинди.

Ҳамкорлик доирасида шунингдек, очиқлик бўйича қонунчиликни такомиллаштириш, коррупцияга қарши курашиш соҳасига фуқаролик жамияти институтларини фаол жалб этиш, аҳолининг барча қатламлари, шунингдек, давлат хизматчилари, тадбиркорларнинг соҳага оид билим ва кўникмаларини ошириш мақсадида ўқитиш тизимини жорий этиш каби йўналишларда ўзаро алоқаларни янада юқори босқичга олиб чиқишга келишиб олинди.

Коррупцияга қарши курашиш агентлиги

Ахборот хизмати