Joriy yilning 31-may kuni Korrupsiyaga qarshi kurashish agentligi hamda AQSH Davlat departamentining Xalqaro narkotik moddalar va huquqni muhofaza qilish ishlari bo‘yicha byurosi (INL) o‘rtasida o‘zaro hamkorlikni yanada rivojlantirish masalalariga bag‘ishlangan uchrashuv bo‘lib o‘tdi.

Uchrashuvda Agentlik rahbariyati, INL katta maslahatchisi Jeyms Kallaxan, Byuroning O‘zbekistondagi vakolatxonasi rahbari Jek Anderson va har ikki tashkilot masʼul xodimlari ishtirok etdi.

Muloqot avvalida Agentlik direktori A.Burxanov O‘zbekistonda korrupsiyaga qarshi kurashish siyosatidagi tendensiyalar xususida so‘z yuritib, sohadagi islohotlarni samarali amalga oshirishda AQSH tomoni yaqindan ko‘mak ko‘rsatib kelayotganligini mamnuniyat bilan eʼtirof etdi.

Uchrashuvda hamkorlikning yangi yo‘nalishlari, xususan,  O‘zbekistonda korrupsiyaga qarshi kurashish bo‘yicha strategiya hamda qonun hujjatlari loyihalarini ishlab chiqishda ekspertlik ko‘magini ko‘rsatish, Korrupsiyaga qarshi kurashish Mintaqaviy markazi (Xab) faoliyatini yo‘lga qo‘yish kabi masalalarda hamkorlik masalalari muhokama qilindi.

Hamkorlik doirasida shuningdek, ochiqlik bo‘yicha qonunchilikni takomillashtirish, korrupsiyaga qarshi kurashish sohasiga fuqarolik jamiyati institutlarini faol jalb etish, aholining barcha qatlamlari, shuningdek, davlat xizmatchilari, tadbirkorlarning sohaga oid bilim va ko‘nikmalarini oshirish maqsadida o‘qitish tizimini joriy etish kabi yo‘nalishlarda o‘zaro aloqalarni yanada yuqori bosqichga olib chiqishga kelishib olindi.

Korrupsiyaga qarshi kurashish agentligi

Axborot xizmati