Коррупцияга қарши курашиш агентлиги ва Ўзбекистон Республикаси Рақобатни ривожлантириш ва истеъмолчилар ҳуқуқларини ҳимоя қилиш қўмитаси ўртасида 2020 йил 12 декабрда ҳамкорлик меморандуми имзоланган.

Мазкур меморандум доирасида Агентлик томонидан Қўмитада Ички аудит, коррупцияга қарши комплаенс ва ҳуқуқни қўллаш амалиётини ўрганиш бошқармаси фаолиятини жорий этиш ва самарали ишлашаини ташкил этишда амалий кўмак берилди.  Шунингдек, Қўмитанинг функциялари бўйича коррупция хавф-хатарлари юқори бўлган лавозимлар аниқлаб олиниб, уларнинг хатар даражасини минималлаштириш юзасидан тегишли чоралар кўриб келинмоқда.

Қўмита фаолиятида манфаатлар тўқнашувини аниқлаш, олдини олиш ва тартибга солиш тартибини белгилашга қаратилган Манфаатлар тўқнашувини бошқариш ҳақидаги Низом ишлаб чиқилиб, тасдиқланди.

Коррупциявий хатти-ҳаракатларнинг олдини олиш ва уларнинг содир этилишига имконият яратадиган шарт-шароит ва сабабларни бартараф этиш, ходимларнинг хуқуқий онгини ошириш ва уларни Ўзбекистон Республикаси қонунчилигига ва Қўмитанинг коррупцияга қарши курашиш бўйича ички ҳужжатларига қатъий риоя қилишини таъминлаш мақсадида Ходимларни коррупцияга қарши курашиш соҳасида ўқитишни ташкил қилиш  ҳақидаги йўриқнома ишлаб чиқилди. Бу борада қўмита марказий аппарати, ҳудудий органлари  ва тизимдаги ташкилотларида  коррупцияга қарши курашиш ва унинг олдини олиш бўйича биргаликда алоҳида дастур тасдиқланганлигини ҳам таъкидлаш жоиз. 

Бугунги кунда Қўмита ва унинг қуйи тизимларига ходимлар Давлат фуқаролик хизматлари вакант лавозимларининг ягона очиқ портали — https://vacancy.argos.uz/  орқали  очиқ танлов асосида қабул қилинмоқда.

Ҳамкорликдаги амалий тадбирлардан яна бири қўмитадаги ишга қабул қилиш, лавозимга тайинлаш ва ротация қилиш жараёнида ҳар йили манфаатлар тўқнашуви тўғрисидаги аризани тўлдириш, манфаатлар тўқнашувининг келиб чиқиш факти бўйича хабар бериш амалиёти йўлга қўйилганлиги бўлди. 

Тизимда ҳуқуқбузарликларни аниқлаш ва ўз вақтида олдини олиш мақсадида коррупцияга қарши курашиш масалалари бўйича “Ишонч телефони” (71-207-49-00), коррупцияга қарши курашишга оид аноним шикоятлар йўллаш учун электрон почта (acc@antimon.gov.uz) ҳамда @ACRUantic_bot телеграм боти ишга туширилди.

 “Жисмоний ва юридик шахсларнинг мурожаатлари тўғрисида”ги, “Коррупцияга қарши курашиш тўғрисида”ги қонунларга асосан аризаларни қабул қилиш, Қўмита тизимидаги коррупция билан боғлиқ шикоятлар кўриб чиқиш тартибларига оид Низом ишлаб чиқилганлиги ҳам ҳамкорликдаги саъй-ҳаракатларнинг натижадорлигига хизмат қилмоқда.

Агентлик ходимлари томонидан Қўмитанинг consumer.gov.uz расмий веб-сайти ўрганиб чиқилиб, сайтда жойлаштирилиши лозим бўлган очиқ маълумотлар юзасидан тавсиялар берилди ва эндиликда очиқ маълумотлар доимий янгилаб борилиб, фаолиятдаги очиқлик ва шаффофлик таъминланишига эришилмоқда. 

Агентлик ва Қўмита вакиллари иштирокида ҳамкорликда ўрганишлар ташкил қилиб келинмоқда. Жумладан, ўрганишлар натижасида Академик Й.Ҳ.Тўрақулов номидаги Республика ихтисослаштирилган эндокринология илмий-амалий тиббиёт марказига 26 дона қиймати 14 млрд сўмлик тиббий техника воситаларини харид қилишда ҳамда “Таъминот ва логистика хизмати” ДУК томонидан амалга оширилган 14 та танловда рақобатни чеклаш ҳолатлари мавжудлиги аниқланди.  

Қўшма ўқув тадбирлари ҳам икки томонлама ҳамкорликни янада мустаҳкамлашда муҳим ўрин тутмоқда. Хусусан, Агентлик ва Қўмитанинг Ички аудит, коррупцияга қарши комплаенс ва ҳуқуқни қўллаш амалиётини ўрганиш бошқармаси ҳамкорлигида тизим ходимларини коррупцияга қарши курашиш соҳасида билим ва кўникмаларини ошириш мақсадида жорий йилнинг 28-апрель куни “Коррупцияга қарши курашиш ҳар биримизни бурчимиз” мавзусида ўқув семинари ташкил этилди. 

Қўмита томонидан Иқтисодий ҳамкорлик ва тараққиёт ташкилоти (OECD) билан ҳамкорликда жорий йилнинг 13-март куни ўтказилган “Картель келишувларга ҳамда давлат харидларини амалга оширишда тил бириктириш ҳолатларига қарши самарали курашиш” мавзусига бағишланган халқаро конференцияда ҳамда 16-март куни “Давлат харидларида тил бириктириш ҳолатларига қарши курашиш” мавзусида бўлиб ўтган ўқув семинарда Агентлик вакиллари иштирок этди.

Мазкур тадбирлар давлат харидлари соҳасида тил бириктириш ва коррупциянинг олдини олиш йўналишларига тўғридан-тўғри тааллуқли бир қатор долзарб масалаларни муҳокама қилиш, OECDнинг “Давлат харидлари бўйича ўтказиладиган танловларда (тендерлар) тил бириктириш ҳолатларини аниқлаш” бўйича услубий тавсияларини амалиётга татбиқ этиш орқали юқорида қайд этилган йўналишларда мавжуд муаммо ва камчиликларни бартараф этиш, халқаро ва миллий экспертлар ўртасида фикр-мулоҳаза ва илғор хорижий тажрибалар алмашиш имконини берди.

Коррупцияга қарши курашиш агентлиги
Ахборот хизмати