Korrupsiyaga qarshi kurashish agentligi va O‘zbekiston Respublikasi Raqobatni rivojlantirish va isteʼmolchilar huquqlarini himoya qilish qo‘mitasi o‘rtasida 2020-yil 12-dekabrda hamkorlik memorandumi imzolangan.

Mazkur memorandum doirasida Agentlik tomonidan Qo‘mitada Ichki audit, korrupsiyaga qarshi komplayens va huquqni qo‘llash amaliyotini o‘rganish boshqarmasi faoliyatini joriy etish va samarali ishlashaini tashkil etishda amaliy ko‘mak berildi.  Shuningdek, Qo‘mitaning funksiyalari bo‘yicha korrupsiya xavf-xatarlari yuqori bo‘lgan lavozimlar aniqlab olinib, ularning xatar darajasini minimallashtirish yuzasidan tegishli choralar ko‘rib kelinmoqda.

Qo‘mita faoliyatida manfaatlar to‘qnashuvini aniqlash, oldini olish va tartibga solish tartibini belgilashga qaratilgan Manfaatlar to‘qnashuvini boshqarish haqidagi Nizom ishlab chiqilib, tasdiqlandi.

Korrupsiyaviy xatti-harakatlarning oldini olish va ularning sodir etilishiga imkoniyat yaratadigan shart-sharoit va sabablarni bartaraf etish, xodimlarning xuquqiy ongini oshirish va ularni O‘zbekiston Respublikasi qonunchiligiga va Qo‘mitaning korrupsiyaga qarshi kurashish bo‘yicha ichki hujjatlariga qatʼiy rioya qilishini taʼminlash maqsadida Xodimlarni korrupsiyaga qarshi kurashish sohasida o‘qitishni tashkil qilish  haqidagi yo‘riqnoma ishlab chiqildi. Bu borada qo‘mita markaziy apparati, hududiy organlari  va tizimdagi tashkilotlarida  korrupsiyaga qarshi kurashish va uning oldini olish bo‘yicha birgalikda alohida dastur tasdiqlanganligini ham taʼkidlash joiz. 

Bugungi kunda Qo‘mita va uning quyi tizimlariga xodimlar Davlat fuqarolik xizmatlari vakant lavozimlarining yagona ochiq portali — https://vacancy.argos.uz/  orqali  ochiq tanlov asosida qabul qilinmoqda.

Hamkorlikdagi amaliy tadbirlardan yana biri qo‘mitadagi ishga qabul qilish, lavozimga tayinlash va rotatsiya qilish jarayonida har yili manfaatlar to‘qnashuvi to‘g‘risidagi arizani to‘ldirish, manfaatlar to‘qnashuvining kelib chiqish fakti bo‘yicha xabar berish amaliyoti yo‘lga qo‘yilganligi bo‘ldi. 

Tizimda huquqbuzarliklarni aniqlash va o‘z vaqtida oldini olish maqsadida korrupsiyaga qarshi kurashish masalalari bo‘yicha “Ishonch telefoni” (71-207-49-00), korrupsiyaga qarshi kurashishga oid anonim shikoyatlar yo‘llash uchun elektron pochta (acc@antimon.gov.uz) hamda @ACRUantic_bot telegram boti ishga tushirildi.

 “Jismoniy va yuridik shaxslarning murojaatlari to‘g‘risida”gi, “Korrupsiyaga qarshi kurashish to‘g‘risida”gi qonunlarga asosan arizalarni qabul qilish, Qo‘mita tizimidagi korrupsiya bilan bog‘liq shikoyatlar ko‘rib chiqish tartiblariga oid Nizom ishlab chiqilganligi ham hamkorlikdagi saʼy-harakatlarning natijadorligiga xizmat qilmoqda.

Agentlik xodimlari tomonidan Qo‘mitaning consumer.gov.uz rasmiy veb-sayti o‘rganib chiqilib, saytda joylashtirilishi lozim bo‘lgan ochiq maʼlumotlar yuzasidan tavsiyalar berildi va endilikda ochiq maʼlumotlar doimiy yangilab borilib, faoliyatdagi ochiqlik va shaffoflik taʼminlanishiga erishilmoqda. 

Agentlik va Qo‘mita vakillari ishtirokida hamkorlikda o‘rganishlar tashkil qilib kelinmoqda. Jumladan, o‘rganishlar natijasida Akademik Y.H.To‘raqulov nomidagi Respublika ixtisoslashtirilgan endokrinologiya ilmiy-amaliy tibbiyot markaziga 26 dona qiymati 14 mlrd so‘mlik tibbiy texnika vositalarini xarid qilishda hamda “Taʼminot va logistika xizmati” DUK tomonidan amalga oshirilgan 14 ta tanlovda raqobatni cheklash holatlari mavjudligi aniqlandi.  

Qo‘shma o‘quv tadbirlari ham ikki tomonlama hamkorlikni yana-da mustahkamlashda muhim o‘rin tutmoqda. Xususan, Agentlik va Qo‘mitaning Ichki audit, korrupsiyaga qarshi komplayens va huquqni qo‘llash amaliyotini o‘rganish boshqarmasi hamkorligida tizim xodimlarini korrupsiyaga qarshi kurashish sohasida bilim va ko‘nikmalarini oshirish maqsadida joriy yilning 28-aprel kuni “Korrupsiyaga qarshi kurashish har birimizni burchimiz” mavzusida o‘quv seminari tashkil etildi. 

Qo‘mita tomonidan Iqtisodiy hamkorlik va taraqqiyot tashkiloti (OECD) bilan hamkorlikda joriy yilning 13-mart kuni o‘tkazilgan “Kartel kelishuvlarga hamda davlat xaridlarini amalga oshirishda til biriktirish holatlariga qarshi samarali kurashish” mavzusiga bag‘ishlangan xalqaro konferensiyada hamda 16-mart kuni “Davlat xaridlarida til biriktirish holatlariga qarshi kurashish” mavzusida bo‘lib o‘tgan o‘quv seminarda Agentlik vakillari ishtirok etdi.

Mazkur tadbirlar davlat xaridlari sohasida til biriktirish va korrupsiyaning oldini olish yo‘nalishlariga to‘g‘ridan-to‘g‘ri taalluqli bir qator dolzarb masalalarni muhokama qilish, OECDning “Davlat xaridlari bo‘yicha o‘tkaziladigan tanlovlarda (tenderlar) til biriktirish holatlarini aniqlash” bo‘yicha uslubiy tavsiyalarini amaliyotga tatbiq etish orqali yuqorida qayd etilgan yo‘nalishlarda mavjud muammo va kamchiliklarni bartaraf etish, xalqaro va milliy ekspertlar o‘rtasida fikr-mulohaza va ilg‘or xorijiy tajribalar almashish imkonini berdi.

Korrupsiyaga qarshi kurashish agentligi
Axborot xizmati