Бугун Коррупцияга қарши курашиш агентлиги директори А.Бурханов Япония халқаро ҳамкорлик агентлиги (JIСА) вакиллари ва экспертлар гуруҳини қабул қилди.

Учрашувда хорижий томондан JIСА бош офисининг Шарқий ва Марказий Осиё ва Кавказ департаменти директори ўринбосари Хидеки Танабе, бўлим бошлиғи Ацуму Ямагучи, дастур масъул ходими Кейсуке Ёшимура, катта вакил Ёшимаса Такемура, шунингдек, Нагоя иқтисодиёт университети профессори Кацуя Ичихаши, JIСАнинг Ўзбекистондаги ваколатхонаси вакиллари Н. Токи ва Ш.Шарипов иштирок этди.

Учрашувдан мақсад - ўзаро самарали ҳамкорликнинг янги йўналишларини белгилаб олиш, бу борада ҳамкорлик лойиҳасини муҳокама қилишдан иборат бўлди.

Мулоқот аввалида А.Бурханов мамлакатимизда коррупцияга қарши курашиш бўйича давлат сиёсатининг мазмун-моҳияти хусусида сўз юритиб, соҳада амалга оширилаётган ислоҳотларнинг самарадорлигини янада оширишда халқаро стандартлар ҳамда илғор хорижий тажрибани кенг қўллаш долзарб эканлигига алоҳида урғу берди.

Мазкур йўналишда Япония, хусусан, JIСА билан ҳамкорлик ва унинг самараларини мамнуният билан эътироф этиб, коррупцияга қарши курашиш соҳасида йўлга қўйилган конструктив мулоқот ва ҳамкорликни изчил давом эттириш муҳим аҳамиятга эга эканлигини таъкидлаб ўтди.

Шу нуқтаи назардан учрашувда давлат харидлари соҳасида манфаатлар тўқнашуви ва афилланганлик ҳолатларини аниқлаш механизмини кучайтириш, давлат хизматчиларининг “ҳалоллик вакцинаси” тамойили асосида одоб-аҳлоқ қоидалари бўйича ўқитишни ташкил этиш, коррупцияга қарши самарали курашишга оид қонунчиликни такомиллаштириш каби бир қатор йўналишларда ўзаро ҳамкорликни янги босқичга олиб чиқиш бўйича Агентлик томонидан илгари сурилган таклифлар муҳокама қилинди.

Ўз ўрнида, Ҳидеки Танабе мазкур соҳадаги муҳим таклиф ва ташаббусларни қўллаб-қувватлашга тайёр эканлигини маълум қилди.

Учрашувда ҳамкорликда амалга оширилиши кўзда тутилган лойиҳа ва тадбирларни ҳар томонлама пухта кўриб чиқиш, уларни амалга оширишнинг аниқ механизмларини ишлаб чиқиш, биргаликдаги мақсад-вазифаларни белгилаб олиш мақсадида мазкур масалалардаги муҳокамаларни яқин вақт ичида бўлиб ўтадиган навбатдаги мулоқотда давом эттиришга келишиб олинди.

Коррупцияга қарши курашиш агентлиги

Ахборот хизмати