Ёзёвон туман йўллардан фойдаланиш унитар корхонаси буюртмачилигида 2023 йил 14 июнь куни ўтказилган 1 млрд 38 млн сўмлик давлат харидида қонунчиликка зид ҳолатлар аниқланди. 

Ўрганиш давомида аниқланишича, харидда иштирок этган 2 нафар тадбиркорнинг таъсисчиси ва раҳбари бир-бирига яқин қариндош, яъни эр-хотин бўлса-да, харид комиссияси томонидан ушбу  аффилланганлик ҳолатига баҳо берилмаган ва ноҳалол рақобат келиб чиққан бўлишига қарамай, танловни ўтказишни вақтинчалик бекор қилиш чоралари кўрилмаган.

Натижада “Давлат харидлари тўғрисида”ги Қонуннинг 10-моддаси (рақобат ва холислик принципи), 14-моддаси (манфаатлар тўқнашуви), 23-моддаси (харид қилиш тартиб-таомиллари иштирокчиси) ва 42-моддаси (иштирокчини харид қилиш тартиб-таомилларида иштирок этишдан четлатиш шартлари)  ҳамда “Рақобат тўғрисида”ги Қонун бир неча талаблари бузилишига йўл қўйилган.

Шунингдек, давлат харидида қатнашган икки тадбиркорнинг ҳужжатларини ўрганишда уларнинг тайёрланиши, шакли ва шу каби бошқа ҳолатларга умуман баҳо берилмаган, айнан ҳужжатларни бир жойда тайёрланганлиги кўриб чиқилмасдан баённома расмийлаштирилган.

Мазкур ҳолатлар бўйича харид комиссиясининг баённомасини бекор қилиш тўғрисида Агентлик томонидан 2023 йил 14 июнь куни буюртмачига тақдимнома киритилди ҳамда қонуний чора кўриш учун тўпланган ҳужжатлар Ўзбекистон Республикаси Иқтисодиёт ва молия вазирлиги ҳузуридаги Давлат молиявий назорати инспекциясига юборилди.

Агентликнинг тақдимномасига биноан Ёзёвон туман йўллардан фойдаланиш унитар корхонаси томонидан 16 июнь куни харид комиссиясининг баённомаси бекор қилинди.

Коррупцияга қарши курашиш агентлиги
Ахборот хизмати