Ўзбекистон Республикаси Президентининг 2021 йил 16 июндаги ПФ-6247-сон Фармони билан тасдиқланган Очиқ маълумотлар сифатида жойлаштирилиши керак бўлган ижтимоий аҳамиятга молик маълумотлар рўйхатига мувофиқ, махсус автоматлаштирилган фото ва видео қайд этиш дастурий-техник воситалари ўрнатилган аниқ манзиллар, индивидуал тартибда ҳар бир дастурий-техник воситаси қайд этадиган йўл ҳаракати қоидалари бузилиши тури тўғрисидаги маълумотлар очиқ эълон қилиниши белгиланган.

Коррупцияга қарши курашиш агентлиги томонидан мазкур маълумотларнинг очиқланиш ҳолати бўйича мунтазам мониторинг олиб борилмоқда.

Шунга кўра, Ички ишлар вазирлиги томонидан жорий йилнинг 25 июль куни ҳолатига Республика ҳудудида ишга туширилган онлайн режимида ишловчи фоторадарлар ва интеллектуал режимида ишловчи камералар тўғрисида эълон қилинган маълумот Агентлик томонидан таҳлил қилинди.

Маълум бўлишича, бугунги кунда республика бўйича жами 746 та онлайн режимида ишловчи фоторадарлар ва интеллектуал режимида ишловчи камералар ишга туширилган.

Шунингдек, фоторадарлар ва интеллектуал режимида ишловчи камераларнинг 23 таси йўл ҳаракати қоидаларига риоя этилишини назорат қилувчи, 723 таси рухсат этилган ҳаракатланиш тезлигига ҳамда йўл ҳаракати қоидаларига риоя этилишини назорат қилишга мўлжалланган стационар радарларни ташкил этади.

Батафсил маълумотлар билан бу ерда танишиш мумкин.

Коррупцияга қарши курашиш агентлиги

Ахборот хизмати